ပွဲပြီးခါနီးမှာ ၁၀ ယောက်တည်းနဲ့ ကစားခဲ့ရပေမယ့် နည်းပြ သောမတ်စ် တူချယ်ရဲ့ အင်္ဂလန် အသင်းဟာ မက္ကဆီကိုရဲ့ ပြင်းထန်တဲ့ ဖိအားတွေကို ကြံ့ကြံ့ခံပြီး ၃-၂ ဂိုးနဲ့ အနိုင်ရရှိကာ ကမ္ဘာ့ဖလား ကွာတားဖိုင်နယ်ကို တက်လှမ်းသွားခဲ့ပါပြီ။ အင်္ဂလန်ဟာ ကမ္ဘာ့ဖလား ကွာတားဖိုင်နယ် မှာတော့ ဘရာဇီးလ်ကို ကျော်ဖြတ်လာတဲ့ နော်ဝေ အသင်းနဲ့ ရင်ဆိုင်ရမှာပါ။
အက်ဇ်တီကာ ကွင်းကြီးပေါ်မှာ မိုးကြိုးမုန်တိုင်း ကျရောက်ခဲ့တာကြောင့် ပွဲက တစ်နာရီလောက် နောက်ကျပြီးမှ စတင်ခဲ့ပါတယ်။ ပွဲစကတည်းက မက္ကဆီကိုတို့ ပွဲကို စိုးမိုးထားနိုင်ခဲ့ပြီး ပွဲချိန် ၁၅ မိနစ်မှာ အယ်လ်ဗာရာဒိုရဲ့ ဖြတ်တင်ဘော ကနေ ရာအူးလ် ဟင်မီနက်ဇ်က အပိုင် ခေါင်းတိုက်ခဲ့ပေမယ့် အင်္ဂလန် ဂိုးသမား ဂျော်ဒန် ပစ်ခ်ဖို့ဒ်က အကောင်းဆုံး ပုတ်ထုတ်ကာကွယ်ခဲ့ပါတယ်။
အဲဒီနောက် မှာတော့ အင်္ဂလန်တို့ ပွဲကို ပြန်လည်ထိန်းချုပ်နိုင်ခဲ့ပြီး ပွဲချိန် ၃၆ မိနစ်မှာ ကောင်တာ တိုက်စစ်ကနေ ဘူကာယို ဆာကာ ဖြတ်တင်ပေးလိုက်တဲ့ ဘောလုံးကို ဂျုဒ် ဘယ်လင်ဟမ်က ခေါင်းတိုက်ပြီး ပထမ ဦးဆောင်ဂိုး သွင်းယူပေးခဲ့ပါတယ်။ အဲဒီ ဂိုးသွင်းပြီး ၉၈ စက္ကန့်အကြာမှာပဲ အင်္ဂလန်တို့ ကွင်းလယ်မှာ ဘောလုံးလုယူနိုင်ခဲ့ပြီး ဘယ်လင်ဟမ်နဲ့ ဟယ်ရီကိန်းတို့ ဝမ်းတူး ရိုက်ကာ ဘယ်လင်ဟမ် ကပဲ အနီးကပ် ပိတ်သွင်းပြီး ဒုတိယဂိုးကို ထပ်မံရရှိခဲ့ပါတယ်။ ဒါပေမယ့် ပွဲချိန် ၄၀ မိနစ်မှာ အင်္ဂလန် နောက်တန်း ဖျက်ထုတ်ပုံ မသေချာတာကြောင့် မက္ကဆီကို တိုက်စစ်မှူး ကီနိုနက်စ်က အလွတ်တည်ကန်ဘောက တစ်ဆင့် ပထမပိုင်း ချေပဂိုးတစ်ဂိုး ပြန်သွင်းခဲ့လို့ ပထမပိုင်းမှာ အင်္ဂလန်က ၂-၁ နဲ့ ဦးဆောင်ထားနိုင်ခဲ့ပါတယ်။
ဒုတိယပိုင်း ပွဲချိန် ၅၄ မိနစ်မှာတော့ အင်္ဂလန် အတွက် အလှည့်အပြောင်းတစ်ခု ဖြစ်ခဲ့ပါတယ်။ အင်္ဂလန် နောက်ခံလူ ဂျာရယ် ကွမ်ဆာဟာ ဘောလုံးကို ဖျက်ထုတ်ရာမှာ မက္ကဆီကို ကစားသမား ဂယ်လာဒိုရဲ့ ခြေထောက်ကို နင်းမိခဲ့တာကြောင့် VAR ပြန်ကြည့်ပြီး တိုက်ရိုက် အနီကတ်နဲ့ ထုတ်ပယ်ခံခဲ့ရပါတယ်။ ၁၀ ယောက်တည်း ကျန်တော့တဲ့ အင်္ဂလန် အတွက် ပွဲချိန် မိနစ် ၆၀ မှာ ဟယ်ရီကိန်းရဲ့ ပေးပို့မှု ကနေ အန်တိုနီ ဂေါ်ဒွန် ပင်နယ်တီ ရရှိခဲ့ပြီး၊ ဒီပင်နယ်တီကို ဟယ်ရီကိန်းက အမှားအယွင်း မရှိ ကန်သွင်းကာ ၃-၁ ဖြစ်စေခဲ့ပါတယ်။
ဒါပေမယ့် မကြာခင်မှာပဲ ဟယ်ရီကိန်းက မက္ကဆီကို ကစားသမား ဂူတီးရက်ဇ်ကို ဖျက်ထုတ်ရာ ကနေ ပင်နယ်တီ ပြန်ပေးခဲ့ရပြီး ရာအူးလ် ဟင်မီနက်ဇ်က မက္ကဆီကို အတွက် ဒုတိယ ချေပဂိုး သွင်းယူခဲ့ပါတယ်။ အဲဒီနောက် မက္ကဆီကိုတို့ အသည်းအသန် ဖိအားပေး ချေပဂိုး ရှာခဲ့ပေမယ့် အင်္ဂလန် နောက်တန်းက အသက်ပေး ကာကွယ်ခဲ့ကြလို့ အင်္ဂလန်တို့ ၃-၂ ဂိုးနဲ့ အဖိုးတန် နိုင်ပွဲကို ထိန်းထားနိုင်ခဲ့ပါတယ်။
သမိုင်းဝင် မှတ်တမ်းများနှင့် စိတ်ဝင်စားဖွယ် အချက်အလက်များ
မက္ကဆီကို အသင်းဟာ သူတို့ရဲ့ အက်ဇ်တီကာကွင်းမှာ ကမ္ဘာ့ဖလား ၁၀ ပွဲဆက် ရှုံးပွဲ မရှိ စံချိန်တင်ထားခဲ့တာပါ။ ၁၉၈၆ ခုနှစ်တုန်းက မာရာဒိုနာရဲ့ ‘Hand of God’ သွင်းဂိုးကြောင့် အင်္ဂလန်တို့ ဒီကွင်းမှာ ရှုံးနိမ့်ခဲ့ဖူးတဲ့ သမိုင်းဆိုး ရှိခဲ့ပေမယ့် အခုပွဲမှာတော့ အင်္ဂလန်တို့ ကလဲ့စားချေနိုင်ခဲ့ပါတယ်။
ဘယ်လင်ဟမ်ဟာ ပွဲချိန် ၃၈ မိနစ်မတိုင်ခင်မှာတင် ၂ ဂိုး သွင်းယူနိုင်ခဲ့တာ ဖြစ်ပြီး ဒါဟာ အင်္ဂလန် ကမ္ဘာ့ဖလား သမိုင်းမှာ ၁၉၈၆ ခုနှစ်က ပိုလန်နဲ့ပွဲမှာ ဂယ်ရီ လိုင်နီကာ (၁၄ မိနစ်) သွင်းခဲ့ပြီး နောက်ပိုင်း အစောဆုံး ၂ ဂိုး သွင်းနိုင်တဲ့ ဒုတိယမြောက် ကစားသမား ဖြစ်လာခဲ့ပါတယ်။
ကီနိုနက်စ်ဟာ မက္ကဆီကို အတွက် ကမ္ဘာ့ဖလား သွင်းဂိုး ၄ ဂိုး အထိ ရှိလာပြီး လူးဝစ် ဟာနန်ဒက်ဇ်၊ ဟာဗီယာ ဟာနန်ဒက်ဇ် တို့နဲ့ အတူ ဂိုးအများဆုံး သွင်းသူ အဖြစ် ပူးတွဲ ရပ်တည်နိုင်ခဲ့သလို ကမ္ဘာ့ဖလား ၃ ပွဲ ဆက်တိုက် ဂိုးသွင်းနိုင်တဲ့ ပထမဆုံး မက္ကဆီကို ကစားသမားလည်း ဖြစ်လာပါတယ်။
အသက် ၃၂ နှစ် အရွယ် အသင်းခေါင်းဆောင် ဟယ်ရီကိန်းဟာ ဒီနှစ် ကမ္ဘာ့ဖလားမှာ ၆ ဂိုးမြောက် သွင်းယူနိုင်ခဲ့တာ ဖြစ်ပြီး ဒါဟာ ဂယ်ရီ လိုင်နီကာ (၁၉၈၆) နဲ့ ကိန်း ကိုယ်တိုင် (၂၀၁၈) တို့ပြီးရင် အင်္ဂလန် ကစားသမား တစ်ဦး အနေနဲ့ ကမ္ဘာ့ဖလား တစ်ခုတည်းမှာ ၆ ဂိုး စံချိန်ကို ဒုတိယအကြိမ်မြောက် ရရှိတာ ဖြစ်ပါတယ်။
ဂိုးသမား ပစ်ခ်ဖို့ဒ်ဟာ အင်္ဂလန် အတွက် ကမ္ဘာ့ဖလား ၁၇ ပွဲမြောက် ကစားခွင့် ရခဲ့ပြီး ဂန္ထဝင် ဂိုးသမားကြီး ပီတာ ရှီလ်တန်ရဲ့ သမိုင်းဝင် စံချိန်ကို လိုက်မှီသွားခဲ့ပါတယ်။ အခုပွဲမှာလည်း သူဟာ မက္ကဆီကိုရဲ့ ဂိုးကန်သွင်းချက် ၂၀ ထဲက ဂိုးပေါက်တည့်တဲ့ ၅ ကြိမ်စလုံးကို အကောင်းဆုံး ကာကွယ်ပေးခဲ့တာပါ။
အင်္ဂလန် အသင်းဟာ ကမ္ဘာ့ဖလား ပြိုင်ပွဲ သမိုင်းတစ်လျှောက် ၁၁ ကြိမ်မြောက် ကွာတားဖိုင်နယ်ကို တက်လှမ်းနိုင်ခဲ့တာ ဖြစ်ပြီး သူတို့ထက် ပိုများတာဆိုလို့ ဘရာဇီးလ် (၁၅ ကြိမ်) နဲ့ ဂျာမနီ (၁၄ ကြိမ်) ပဲ ရှိပါတော့တယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
