ကမ္ဘာ့ဖလား ပြိုင်ပွဲဝင် တူနီးရှား အသင်း ကတာ့ ဆွီဒင်ကို ဂိုးပြတ် ရှုံးနိမ့်ပြီးနောက် နည်းပြ ဆာဘရီ လာမူချီကို ရာထူး ကနေ ထုတ်ပယ်လိုက်ပြီ ဖြစ်ပါတယ်။ တဆက်တည်းမှာပဲ တူနီးရှားက ကမ္ဘာ့ဖလား အုပ်စု (F) နောက်ဆုံး ပွဲစဉ် နှစ်ခု ဖြစ်တဲ့ ဂျပန်၊ နယ်သာလန်တို့နဲ့ ပွဲစဉ်တွေကို ကိုင်တွယ်ဖို့ ဟာဗီ ရီနတ်ဒ်ကို နည်းပြ ရာထူး ခန့်အပ်လိုက်ပါတယ်။
တူနီးရှား အသင်းဟာ ကမ္ဘာ့ဖလား အုပ်စု အဖွင့် ပွဲစဉ်မှာ ဆွီဒင်ကို ၅-၁ နဲ့ ဂိုးပြတ် ရှုံးနိမ့်ခဲ့ပြီးနောက် နည်းပြချုပ် ဆာဘရီ လာမူချီ ကို ရာထူး ကနေ ထုတ်ပယ်လိုက်တာပါ
အစောပိုင်းက မွန်ဒီယာ ကီဘာယာကို ယာယီ နည်းပြ အဖြစ် ခန့်အပ်ဖို့ စီစဉ်ခဲ့ပေမယ့် နောက်ဆုံး မှာတော့ ဆုံးဖြတ်ချက်ကို ရုတ်တရက် ပြောင်းလဲပြီး ဟာဗီ ရီနတ်ဒ်ကို အစားထိုး ခန့်အပ်လိုက်တာပါ။
ပြီးခဲ့တဲ့ တနင်္ဂနွေနေ့က ကစားခဲ့တဲ့ အုပ်စု (F) အဖွင့် ပွဲစဉ်မှာ တူနီးရှားအသင်းဟာ အခြေအနေ တော်တော်လေး ဆိုးဆိုးရွားရွား ဖြစ်ခဲ့ရပါတယ်။ အဲဒီပွဲမှာ ဆွီဒင် ကစားသမား ယာဆင် အာယာရီ က နှစ်ဂိုး သွင်းယူခဲ့သလို၊ အလက်ဇန္တား အိဆက်ခ်၊ ဗစ်တာ ယောကရက်စ်နဲ့ မာတီးယပ်စ် ဆဗန်ဘက်ဂျ် တို့ကလည်း တစ်ဂိုးစီ သွင်းယူခဲ့ကြတာကြောင့် တူနီးရှားတို့ ဂိုးပြတ် အရှုံးပေးခဲ့ရပါတယ်။
ဒီရှုံးနိမ့်မှုကြောင့် တူနီးရှား အသင်းဟာ နောက်ဆုံး ကစားခဲ့တဲ့ ကမ္ဘာ့ဖလား ပွဲစဉ် ၁၉ ပွဲမှာ ၃ ပွဲသာ အနိုင်ရရှိထားပြီး နိုင်ပွဲရရှိမှု ရာခိုင်နှုန်းဟာလည်း ၁၅.၈ ရာခိုင်နှုန်းသာ ရှိပါတော့တယ်။ ကမ္ဘာ့ဖလား ပြိုင်ပွဲ သမိုင်းတစ်လျှောက် ပွဲပေါင်း ၁၅ ပွဲနဲ့ အထက် ကစားဖူးတဲ့ အသင်းတွေထဲမှာ တူနီးရှားထက် နိုင်ပွဲ ရာခိုင်နှုန်း ပိုနည်းတာဆိုလို့ ဘူလ်ဂေးရီးယား အသင်း တစ်သင်းပဲ ရှိပါတော့တယ်။
ပြီးခဲ့တဲ့ ဇန်နဝါရီလကမှ ဆာမီ ထရာဘယ်လ်ဆီရဲ့ နေရာမှာ အစားထိုး ဝင်ရောက်လာတဲ့ လာမူချီဟာ ကမ္ဘာ့ဖလား ပြိုင်ပွဲကြီး အတွင်း ပွဲစဉ် တစ်ပွဲတည်း အပြီးမှာတင် ရာထူးကနေ ထုတ်ပယ်ခံရတဲ့ သမိုင်းတစ်လျှောက် ပထမဆုံး နည်းပြ ဖြစ်လာခဲ့ပါတယ်။ တူနီးရှား ဘောလုံးအဖွဲ့ချုပ် (FTF) က လာမယ့် စနေနေ့မှာ ကစားမယ့် ဂျပန် အသင်းနဲ့ ပွဲစဉ်မတိုင်ခင် ကီဘာယာကို ယာယီ နည်းပြ အဖြစ် ခန့်အပ်ဖို့ ပြင်ဆင်နေကြောင်း အစောပိုင်းက ထုတ်ပြန်ခဲ့တာပါ။
ဒါပေမယ့်လည်း အင်္ဂါနေ့ မှာတော့ အားလုံးကို အံ့အားသင့်စေမယ့် ဆုံးဖြတ်ချက်တစ်ခု ထွက်ပေါ်လာခဲ့ပြီး ကမ္ဘာ့ဖလား ပြိုင်ပွဲ ပြီးဆုံးတဲ့အထိ ရီနတ်ဒ်ကို နည်းပြသစ် အဖြစ် တာဝန်ပေးအပ်လိုက်ကြောင်း၊ ပြိုင်ပွဲအပြီးမှာ သက်တမ်းတိုးဖို့ အလားအလာလည်း ရှိကြောင်း ကြေညာခဲ့ပါတယ်။
“တူနီးရှား ဘောလုံးအဖွဲ့ချုပ်အနေနဲ့ ဟာဗီ ရီနတ်ဒ်ကို ၂၀၂၆ ကမ္ဘာ့ဖလား ပြိုင်ပွဲ ပြီးဆုံးတဲ့ အထိ အမျိုးသား လက်ရွေးစင်အသင်းရဲ့ နည်းပြချုပ်အဖြစ် ခန့်အပ်လိုက်ပြီး ဒီညနေက စတင်ကာ တာဝန်တွေ ထမ်းဆောင်သွားမှာ ဖြစ်ကြောင်း ကြေညာအပ်ပါတယ်။ ဒါ့အပြင် ကမ္ဘာ့ဖလား ပြိုင်ပွဲ ပြီးဆုံးသွားတဲ့အခါ မှာလည်း ရေရှည် ရည်မှန်းချက်တွေ အပေါ် အခြေခံပြီး စာချုပ်သက်တမ်းတိုးဖို့ အတွက် ဆွေးနွေးမှုတွေ ဆက်လက် လုပ်ဆောင်သွားမှာ ဖြစ်ပါတယ်။” လို့ တူနီးရှား ဘောလုံးအဖွဲ့ချုပ်က သူတို့ရဲ့ Instagram ကနေ တစ်ဆင့် အတည်ပြု ပြောကြားခဲ့ပါတယ်။
ဟာဗီ ရီနတ်ဒ်ဟာ ပြီးခဲ့တဲ့ ၂၀၂၂ ကမ္ဘာ့ဖလား ပြိုင်ပွဲတုန်းက ဆော်ဒီအာရေဗျ အသင်းကို ဦးဆောင်ပြီး အဖွင့်ပွဲစဉ်မှာတင် နောက်ပိုင်းမှာ ချန်ပီယံ ဖြစ်သွားခဲ့တဲ့ အာဂျင်တီးနား အသင်းကို အံ့အားသင့်ဖွယ် အနိုင်ယူပြခဲ့ဖူးသူ ဖြစ်ပါတယ်။ ဒါပေမယ့်လည်း ပိုလန်၊ မက္ကဆီကိုတို့နဲ့ ပွဲတွေမှာ ရှုံးနိမ့်ခဲ့တာကြောင့် အုပ်စု အောက်ဆုံး ကနေပဲ ကမ္ဘာ့ဖလား ပြိုင်ပွဲကို နှုတ်ဆက်ခဲ့ရပါတယ်။
အဲဒီနောက် ၂၀၂၃ အမျိုးသမီး ကမ္ဘာ့ဖလား ပြိုင်ပွဲမှာ ပြင်သစ် အမျိုးသမီး အသင်းကို ကွာတားဖိုင်နယ် အထိ ပို့ဆောင်ပေးခဲ့ပြီး၊ ဆော်ဒီအာရေဗျ အသင်းထံ ဒုတိယအကြိမ် ပြန်လည် ရောက်ရှိလာကာ အခုနှစ် ကမ္ဘာ့ဖလား ပြိုင်ပွဲဆီ အရောက် ပို့ဆောင်ပေးခဲ့ပြန်ပါတယ်။
ဒါ့အပြင် သူဟာ ဇမ်ဘီယာအသင်း (၂၀၁၂)၊ အိုင်ဗရီကို့စ်အသင်း (၂၀၁၅) တို့နဲ့ အတူ အာဖရိကဖလား (AFCON) ချန်ပီယံဆုတွေကို ဆွတ်ခူးပေးခဲ့ဖူးသလို လိုင်လီနဲ့ မော်ရိုကို အသင်းတွေ ကိုလည်း ကိုင်တွယ်ခဲ့ဖူးတဲ့ ဝါရင့် နည်းပြ တစ်ဦး ဖြစ်ပါတယ်။
ရီနတ်ဒ်ဟာ ၂၀၂၄ ခုနှစ် အစပိုင်းကတည်းက ဆိုရင် တူနီးရှားအသင်းကို ကိုင်တွယ်တဲ့ ၇ ယောက်မြောက် နည်းပြချုပ် ဖြစ်လာမှာပါ။ တူနီးရှား အသင်းမှာ နည်းပြ သက်တမ်း ပွဲပေါင်း ၂၀ အထက် အထိ ကြာရှည် ကိုင်တွယ်နိုင်ခဲ့တဲ့ နောက်ဆုံး နည်းပြ ကတော့ ၂၀၂၂ ဇန်နဝါရီကနေ ၂၀၂၄ ဇန်နဝါရီအထိ ၂၇ ပွဲအထိ ကိုင်တွယ်ခဲ့တဲ့ ဂျာလယ် ကာဒရီသာ ရှိပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
