ဆွီဒင် အသင်း ကတော့ သူတို့ရဲ့ အားထားရတဲ့ တိုက်စစ်မှူးတွေရဲ့ သွင်းဂိုးတွေနဲ့ အတူ အုပ်စု (F) အဖွင့် ပွဲစဉ်မှာ တူနီးရှားကို ဂိုးပြတ် အနိုင်ယူပြီး ကမ္ဘာ့ဖလားပြိုင်ပွဲကို အကောင်းဆုံး စတင်နိုင်ခဲ့ပါတယ်။
Monterrey မှာ ယှဉ်ပြိုင် ကစားခဲ့တဲ့ ပွဲစဉ် အတွင်း အလက်ဇန္တား အိဆက်ခ်၊ ဗစ်တာ ယောကရက်စ် တို့ရဲ့ ခြေစွမ်းပြမှု၊ ယာဆင် အာယာရီရဲ့ သွင်းဂိုး ၂ ဂိုး တို့နဲ့ အတူ ဆွီဒင် အသင်းဟာ တူနီးရှားကို ၅-၁ ဆိုတဲ့ ရလဒ်နဲ့ ဂိုးမိုးရွာခဲ့ပါတယ်။ တစ်ဖက် မှာလည်း နယ်သာလန်နဲ့ ဂျပန်တို့ ၂ ဂိုးစီ သရေကျခဲ့တာကြောင့် ဆွီဒင် အသင်း အနေနဲ့ ကမ္ဘာ့ဖလား ရှုံးထွက်အဆင့်ဆီ တက်လှမ်းနိုင်ဖို့ အခွင့်အရေး အများကြီး သာသွားခဲ့ပြီ ဖြစ်ပါတယ်။
ဒီပွဲမှာ တူနီးရှား နွယ်ဖွား တစ်ဦး ဖြစ်တဲ့ အာယာရီကပဲ ပွဲစလို့ ၇ မိနစ်မှာတင် ဝေးလံတဲ့ အကွာအဝေး ကနေ ပြင်းပြင်းထန်ထန် ကန်သွင်းပြီး ဆွီဒင် အတွက် ဦးဆောင်ဂိုးကို စတင် ရှာဖွေပေးခဲ့တာပါ။ တူနီးရှား ဂိုးသမား အာဘီဒယ်လ်မိုဟစ် ချာမက်ခ်ရဲ့ ဘောလုံး ရှင်းထုတ်မှု အမှားအယွင်း ကနေ တစ်ဆင့် အာယာရီ ဂိုးသွင်းနိုင်မယ့် အခွင့်အရေး ရရှိခဲ့တာဖြစ်ပြီး၊ ပွဲချိန် မိနစ် ၃၀ မှာ အိဆက်ခ်က သူ့ရဲ့ ကမ္ဘာ့ဖလား ပထမဆုံး သွင်းဂိုးကို သွင်းယူချိန်မှာလည်း ဂိုးသမား အနေနဲ့ ပိုမိုကောင်းမွန်စွာ ကာကွယ်ခဲ့သင့်တာ ဖြစ်ပါတယ်။
ယောကရက်စ်ရဲ့ ဖန်တီးပေးပို့မှု ကနေ တစ်ဆင့် လစ်ဗာပူးလ် တိုက်စစ်မှူး အိဆက်ခ်က ဂိုးဧရိယာ အစွန်း ကနေ မြေမကျ ကန်သွင်းခဲ့ရာမှာ ဂိုးသမား ချာမက်ခ်ရဲ့ လက်ကြားထဲ ကနေ ဘောလုံးလျှံထွက်ပြီး ဂိုးဝင်သွားခဲ့တာပါ။
ဒါပေမယ့်လည်း ပထမပိုင်း မပြီးခင်မှာ ဟန်နီဘယ် မက်ဂျ်ဘရီရဲ့ ဖြတ်တင်ဘောကနေ အိုမာ ရီကစ်ခ်က ခေါင်းတိုက်သွင်းယူခဲ့လို့ တူနီးရှားတို့ ချေပဂိုးတစ်ဂိုး ပြန်ရခဲ့ပြီး ပွဲထဲကို ပြန်လည် ဝင်ရောက်လာနိုင်ခဲ့ပါတယ်။ ဒါပေမယ့် ပွဲချိန် ၅၉ မိနစ်မှာတော့ တူနီးရှား တို့ရဲ့ ကိုယ်တိုင် ဖန်တီးမိတဲ့ အမှားကနေ တစ်ဆင့် ဂိုးထပ်ပေးခဲ့ရပြန်ပါတယ်။ ဂိုးသမား ချာမက်ခ်က ကွင်းလယ်လူ အယ်လီယက်စ် စခီရီဆီ ဘောလုံးပေးပို့ခဲ့ရာမှာ စခီရီရဲ့ ထိချက် မကောင်းတဲ့ ဘောလုံးကို အိဆက်ခ်က ဖြတ်လုယူပြီးနောက်၊ သူ့ရဲ့ တွဲဖက် တိုက်စစ်မှူး ယောကရက်စ်က ပြတ်ပြတ်သားသား ကန်သွင်းယူခဲ့တာပါ။
ပွဲပြီးခါနီး မှာတော့ လူစားဝင် ကစားသမား မက်တီးယက်စ် ဆဗန်ဘတ်ဂ်က ကွင်းထဲဝင်ဝင်ချင်း ပထမဆုံး ထိချက်မှာတင် ဆွီဒင် အတွက် စတုတ္ထဂိုး သွင်းယူပေးခဲ့ပါတယ်။ ဒီသမိုင်းဝင်ဂိုးကို အစပိုင်းမှာ လူကျွံအလံပြခဲ့ပေမယ့် VAR ပြန်လည် ကြည့်ရှုပြီးနောက် ဂိုးအဖြစ် သတ်မှတ်ပေးခဲ့တာပါ။ အဲဒီနောက် ပွဲပြီးခါနီး နောက်ဆုံး မိနစ် မှာတော့ အာယာရီကပဲ ဝေးလံတဲ့ နေရာ ကနေ ပြင်းပြင်းထန်ထန် ထပ်မံ ကန်သွင်းယူခဲ့လို့ နည်းပြ ဂရေဟမ် ပေါ်တာရဲ့ ဆွီဒင် အသင်းဟာ ၅-၁ ဆိုတဲ့ ရလဒ်နဲ့ ဂိုးပြတ် အနိုင်ရရှိမှုကို အဆုံးသတ်နိုင်ခဲ့ပါတယ်။
ဆွီဒင် အသင်းဟာ ၂၀၂၂ ကမ္ဘာ့ဖလား ပြိုင်ပွဲကို ဝင်ခွင့်မရခဲ့သလို၊ အခုပြိုင်ပွဲကို ရောက်ရှိလာဖို့ အတွက်လည်း ခြေစစ်ပွဲတွေမှာ ရုန်းကန်ခဲ့ရပြီး ပလေးအော့ဖ် အဆင့်ကနေ ခက်ခက်ခဲခဲ တက်လှမ်းခဲ့ရတာပါ။ ဒါပေမယ့် နည်းပြ ပေါ်တာရဲ့ လက်အောက်မှာ ကစားသမားတွေဟာ ယုံကြည်မှု အပြည့်နဲ့ ကစားနိုင်ခဲ့ကြပြီး သူတို့မှာရှိတဲ့ တိုက်စစ်စွမ်းရည်တွေကို အကောင်းဆုံး ပြသနိုင်ခဲ့ကြပါတယ်။
ပထမပိုင်းမှာ နှစ်သင်းပေါင်း မျှော်မှန်းဂိုး (xG) ၀.၄၇ သာ ရှိခဲ့ပေမဲ့ ၃ ဂိုးအထိ သွင်းယူနိုင်ခဲ့ကြတာ ဖြစ်ပြီး၊ ဒါဟာ ၁၉၆၆ ခုနှစ် နောက်ပိုင်း ကမ္ဘာ့ဖလား တစ်ပွဲရဲ့ ဘယ်ပထမပိုင်းမှာမဆို မျှော်မှန်းဂိုး (xG) အနည်းဆုံးနဲ့ ဂိုးအများဆုံး ဖြစ်ပေါ်ခဲ့တဲ့ မှတ်တမ်း ဖြစ်လာခဲ့ပါတယ်။
ဆွီဒင် အသင်းဟာ ကန်သွင်းချက် စုစုပေါင်း ၁၃ ကြိမ်ထဲက ၇ ကြိမ်အထိ ဂိုးပေါက်တည့်ခဲ့ပြီး တိုက်စစ်ပိုင်း တော်တော်လေး ထိရောက်မှု ရှိခဲ့ပါတယ်။ သူတို့ဟာ ကွာတားဖိုင်နယ် အဆင့် အထိ တက်လှမ်းနိုင်ခဲ့တဲ့ ၂၀၁၈ ကမ္ဘာ့ဖလား ပြိုင်ပွဲ တစ်ခုလုံးမှာ သွင်းခဲ့တဲ့ ဂိုးအရေအတွက်ထက် လက်ရှိမှာ ၁ ဂိုးပဲ လျော့နည်းပါတော့တယ်။
ယောကရက်စ်နဲ့ အိဆက်ခ်တို့ အတွဲအဖက်ဟာ ၁၉၆၆ ခုနှစ် နောက်ပိုင်း ဆွီဒင် အသင်း သမိုင်းမှာ ကမ္ဘာ့ဖလား တစ်ပွဲတည်းမှာတင် နှစ်ယောက်စလုံး ဂိုးသွင်း၊ ဂိုးဖန်တီးမှု ပြုလုပ်နိုင်ခဲ့တဲ့ ဒုတိယမြောက် ကစားသမား အတွဲအဖက် ဖြစ်လာခဲ့ပါတယ်။ တစ်ဖက်မှာလည်း ဆဗန်ဘက်ဂျ်ရဲ့ သွင်းဂိုးဟာ ကမ္ဘာ့ဖလား သမိုင်းတစ်လျှောက် လူစားဝင် ကစားသမား တစ်ဦး အတွက် အမြန်ဆုံး သွင်းဂိုး အဖြစ် မှတ်တမ်းဝင်သွားခဲ့ပါတယ်။ အိဆက်ခ်က ပြစ်ဒဏ်ဘောကို ထိချက်ပေးပြီး ဆဗန်ဘက်ဂျ်ကို လူမကျွံအောင် ဖန်တီးပေးခဲ့တာ ဖြစ်ပြီး၊ သူ ကွင်းထဲကို လူစားဝင်ရောက်လာပြီး ၁၂ စက္ကန့်အကြာမှာတင် ဒီဂိုးကို သွင်းယူနိုင်ခဲ့တာပါ။
ဆဗန်ဘက်ဂျ်ဟာ ဆွီဒင် အသင်းသမိုင်းမှာ ကမ္ဘာ့ဖလား ပြိုင်ပွဲ အတွင်း လူစားဝင်ဂိုးသွင်းနိုင်ခဲ့တဲ့ တတိယမြောက် ကစားသမား ဖြစ်ပါတယ်။ ဒါဟာ ၁၉၉၀ ပြည့်နှစ် စကော့တလန်နဲ့ ပွဲတုန်းက ဂလန်း စထရွမ်းဘက်ဂျ်ရဲ့ သွင်းဂိုးပြီးနောက် ပထမဆုံးအကြိမ် ပြန်လည်သွင်းယူနိုင်ခဲ့တာလည်း ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
