ဂျပန် အသင်းဟာ Dallas Stadium မှာ ယှဉ်ပြိုင် ကစားခဲ့တဲ့ ပွဲစဉ် အတွင်း နယ်သာလန် အသင်းရဲ့ ဦးဆောင်ဂိုးတွေကို နှစ်ကြိမ်တိုင်တိုင် နောက်ကနေ လိုက်လံချေပခဲ့ပြီး ပွဲအပြီးမှာ ၂-၂ ရလဒ်နဲ့ အဖိုးတန် သရေ တစ်မှတ်ကို လုယူနိုင်ခဲ့ပါတယ်။ ပွဲချိန် ၈၈ မိနစ် ထောင့်ကန်ဘောကနေတစ်ဆင့် ဂျပန်တို့ရဲ့ ပြင်းထန်တဲ့ ဖိအားပေးမှုတွေက အရာထင်ခဲ့ပြီး ကာမာဒါက အဆုံးအဖြတ် ချေပဂိုးကို သွင်းယူပေးခဲ့တာပါ။ ခရစ်ဆန်စီယို ဆမ်းမာဗီးလေရဲ့ နယ်သာလန် အသင်း အတွက် ပထမဆုံး သွင်းဂိုးကြောင့် လိမ္မော်ရောင်တို့ အဖွင့်ပွဲမှာ အနိုင်သေချာနေခဲ့ရာ ကနေ အခုလို သရေရလဒ် ဖြစ်သွားခဲ့ရတာ ဖြစ်ပါတယ်။
ပွဲစလို့ ၃ မိနစ်မှာတင် ဒွန်ရဲလ် မယ်လန်က ပြိုင်ဘက် နောက်ခံလူကို လှည့်ထွက်ပြီး ဂိုးဆီ ပြင်းပြင်းထန်ထန် ကန်သွင်းခဲ့လို့ နယ်သာလန်တို့ ဦးဆောင်ဂိုးရဖို့ နီးစပ်ခဲ့ပေမယ့် ဂျပန် ဂိုးသမား ဇီယွန် ဆူဇူကီးက ကာကွယ်နိုင်ခဲ့ပါတယ်။ ပထမပိုင်း မှာတော့ နှစ်သင်းစလုံး ဂိုးပေါက်ဖွင့်နိုင်ဖို့ ရုန်းကန်ခဲ့ရပြီး အပြန်အလှန် ထိန်းကစားခဲ့ကြပါတယ်။ ပထမပိုင်းပြီးခါနီး မိနစ်ပိုင်း အလိုမှာ ကေတို နာကာမူရာဟာ ဂိုးဧရိယာ အပြင်ဘက်မှာ နေရာလွတ်ရခဲ့လို့ ဂျပန်အတွက် ဦးဆောင်ဂိုး သွင်းယူပေးနိုင်မယ့် အခွင့်အရေး ရှိခဲ့ပေမဲ့ သူ့ရဲ့ကန်ချက်က ဂိုးတိုင်ဘေး ကနေ လွဲချော်ထွက်သွားခဲ့ပါတယ်။
ဒါပေမယ့် ဒုတိယပိုင်းအစ ၆ မိနစ်မှာတော့ ပွဲက ရုတ်တရက် အသက်ဝင်လာခဲ့ပါတယ်။ တီဂျာနီ ရိုင်းဒါးစ်ရဲ့ ပြစ်ဒဏ်ဘော ကန်ချက်ကို ရိုင်ယန် ဂရာဗန်ဘက်ချ်က ပြန်လည်ရယူပြီး အကွက်မြင်မြင် ဖြတ်တင်ပေးခဲ့ရာမှာ ဗန်ဒိုက်ခ်က အပိုင်ခေါင်းတိုက်ကာ နယ်သာလန်အတွက် ဦးဆောင်ဂိုး သွင်းယူပေးခဲ့ပါတယ်။
ဒါပေမယ့်လည်း နယ်သာလန် တို့ရဲ့ အပျော်ဟာ ၆ မိနစ်ပဲ ခံခဲ့ပြီး ဂျပန် အသင်းက ပွဲအခြေအနေကို ပြန်လည် စိုးမိုးကာ ချေပဂိုး သွင်းယူသွားခဲ့ပါတယ်။ တာကီဖူဆာ ကူဘိုဟာ ညာတောင်ပံ ဘက်မှာ နေရာလွတ် အများကြီး ရရှိသွားခဲ့ပြီး သူ့ရဲ့ ဖန်တီးပေးပို့မှုကို နာကာမူရာက ဂိုးရဲ့ ဘယ်ဘက် အောက်ထောင့်ထဲကို ပြင်းပြင်းထန်ထန် ကန်သွင်းခဲ့တာပါ။ ဒီကန်ချက်ဟာ နယ်သာလန် နောက်ခံလူ ရန်ပေါလ် ဗန်ဟက်ကီနဲ့ အနည်းငယ် ထိမှန်ပြီး လမ်းကြောင်းပြောင်းကာ ဂိုးဝင်သွားခဲ့တာ ဖြစ်ပါတယ်။
ပွဲချိန် ၆၄ မိနစ် မှာတော့ ဂရာဗန်ဘက်ချ်ရဲ့ ဖန်တီးပေးမှု ကနေ တစ်ဆင့် ဆမ်းမားဗီးလ်က နယ်သာလန် အတွက် ဦးဆောင်ဂိုး ပြန်လည် ရယူပေးခဲ့ပြန်ပါတယ်။ ဂရာဗန်ဘက်ချ်က ဘောလုံးကို ညာဘက်ခြမ်းဆီ အကွက်မြင်မြင် ချပေးခဲ့ပြီး ဆမ်းမားဗီးလ်က အတွင်းထဲကို ဆွဲဝင်ကာ ဂိုးရဲ့အဝေးတိုင် အတွင်းထဲ ရောက်အောင် လှလှပပ ကန်သွင်းယူခဲ့တာပါ။ အဲဒီနောက်မှာလည်း ကိုဒီ ဂက်ခ်ပိုရဲ့ ပြင်းထန်တဲ့ ကန်ချက်ကြောင့် ဂျပန် ဂိုးသမား ဆူဇူကီး လက်စွမ်းပြ ကာကွယ်ခဲ့ရပါတယ်။
ဒါပေမယ့် ဂျပန်အသင်း ကတော့ အလျှော့မပေးဘဲ တိုက်စစ်အရှိန်ကို ပိုမြှင့်လာခဲ့ပါတယ်။ ပွဲပြီးခါနီး ရရှိတဲ့ ထောင့်ကန်ဘောကနေ တစ်ဆင့် ကိုကီ အိုဂါဝါ ခေါင်းတိုက်လိုက်တဲ့ ဘောလုံးဟာ ကာမာဒါနဲ့ ထိပြီး ဂိုးထဲကို လိမ့်ဝင်သွားခဲ့ပါတယ်။ နယ်သာလန် ဂိုးသမား ဘတ် ဗာဘရက်ဂျန် တစ်ယောက် လက်နဲ့ ထိမိခဲ့ပေမဲ့ ဂိုးမဝင်အောင်တော့ မတားဆီးနိုင်ခဲ့ပါဘူး။
ကမ္ဘာ့ဖလား ပြိုင်ပွဲ မတိုင်ခင်တုန်းက နယ်သာလန် အသင်းဟာ ပြိုင်ပွဲစုံ ၃ ပွဲ ဆက်တိုက် Open play ကနေ ဂိုးမသွင်းနိုင်ခဲ့တာကြောင့် နည်းပြ ရော်နယ် ကိုးမန်း တစ်ယောက် စိတ်ပျက်ခဲ့ရပြီး ပထမပိုင်း ကစားကွက်အရလည်း အဲဒီပြဿနာက ပြေလည်မယ့်ပုံ မပေါ်ခဲ့ပါဘူး။ တကယ်တမ်း ပြောရရင် ပထမပိုင်းမှာ နယ်သာလန်တို့ ကန်သွင်းခွင့် ရခဲ့တဲ့ ၄ ကြိမ်ထဲက ၃ ကြိမ်ဟာ Set-piece အခြေအနေတွေ (ထောင့်ကန်ဘော ၂ ကြိမ်၊ ပြစ်ဒဏ်ဘော ၁ ကြိမ်) ကနေ ဖြစ်ပေါ်လာခဲ့တာပါ။
ဒါပေမယ့် ခေါင်းဆောင် ဗန်ဒိုက်ခ် ကတော့ အသင်း အတွက် အရေးကြီးတဲ့ သွင်းဂိုးကို နောက်တစ်ကြိမ် ရှာဖွေပေးနိုင်ခဲ့ပါတယ်။ ဗန်ဒိုက်ခ်ဟာ ဒီရာသီ အတွင်း ကလပ်နဲ့ နိုင်ငံအသင်း အတွက် ၆၆ ပွဲမြောက် အဖြစ် ပွဲထွက် ကစားခဲ့တာ ဖြစ်ပြီး (ဥရောပရဲ့ ထိပ်တန်းလိဂ် ၅ ခုက ဘယ်ဥရောပ ကစားသမားထက်မဆို ပိုများပါတယ်)၊ သူ့ရဲ့ ပင်ပန်းနွမ်းနယ်မှု အရိပ်အယောင်တွေကို လုံးဝမပြသဘဲ အကောင်းဆုံး ကစားသွားခဲ့ပါတယ်။ ဒါ့အပြင် သူဟာ နယ်သာလန် အသင်း သမိုင်းမှာ ကမ္ဘာ့ဖလား ပြိုင်ပွဲရဲ့ ဒုတိယမြောက် အသက်အကြီးဆုံး ဂိုးသွင်းရှင် ဖြစ်လာခဲ့သလို၊ ဒါဟာ သူ့ရဲ့ နိုင်ငံတကာ ပြိုင်ပွဲကြီးတွေမှာ ပထမဆုံး သွင်းယူခဲ့တဲ့ သမိုင်းဝင်ဂိုးလည်း ဖြစ်ပါတယ်။
ဒါပေမယ့်လည်း ဂျပန် အသင်းဟာ ကမ္ဘာ့ဖလား ပြိုင်ပွဲတွေရဲ့ ဒုတိယပိုင်းမှာ ပိုမိုအန္တရာယ်ရှိတဲ့ အသင်း ဖြစ်တယ်ဆိုတာကို နောက်တစ်ကြိမ် သက်သေပြလိုက်ပြန်ပါတယ်။ ကမ္ဘာ့ဖလား ပြိုင်ပွဲမှာ သူတို့ နောက်ဆုံး သွင်းခဲ့တဲ့ ၁၀ ဂိုးထဲက ၉ ဂိုးဟာ ဒုတိယပိုင်းတွေမှာ သွင်းယူခဲ့တာ ဖြစ်လို့ပါ။ ဂျပန် အသင်း အနေနဲ့ ကမ္ဘာ့ဖလား ပြိုင်ပွဲသမိုင်းမှာ ၁၆ သင်းအဆင့်ကို ကျော်ဖြတ်ပြီး ကွာတားဖိုင်နယ် အဆင့်ဆီ ပထမဆုံးအကြိမ် တက်လှမ်းချင်တယ် ဆိုရင် သူတို့ရဲ့ အခုလို ကြံ့ကြံ့ခံနိုင်တဲ့ ဇွဲလုံ့လက အဓိက သော့ချက် ဖြစ်လာပါလိမ့်မယ်။ ဒါဟာ ဂျပန် အသင်း အတွက် ၈ ကြိမ်မြောက် ကမ္ဘာ့ဖလား ဝင်ရောက် ယှဉ်ပြိုင်မှု ဖြစ်ပြီး တနင်္ဂနွေနေ့က သူတို့ပြသခဲ့တဲ့ ခြေစွမ်းအရ ဆိုရင်တော့ ဒီတစ်ကြိမ်မှာ အဲဒီမှတ်တမ်းဆိုးကို ချေဖျက်နိုင်မယ့် အလားအလာကောင်းတွေ ရှိနေပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
