၂၀၂၆-၂၀၂၇ ဘောလုံးရာသီ လာလီဂါ ပြိုင်ပွဲကို ကြိုတင် ခံစားကြည့်ခြင်း

၂၀၂-၂၀၂၇ ဘောလုံးရာသီရဲ့ လာလီဂါ ပြိုင်ပွဲကြီးဟာ အခု တစ်ပတ်မှာပဲ ပြန်လည် စတင်တော့မှာ ဖြစ်ပါတယ်။ ဒီရာသီ လာလီဂါ ကတော့ ချန်ပီယံဆုကို ကာကွယ်မယ့် နည်းပြ ဟန်ဆီ ဖလစ်ခ်ရဲ့ ဘာစီလိုနာကို တကျော့ပြန် နည်းပြကြီး ဟိုဆေး မော်ရင်ညိုရဲ့ ရီးရဲလ်မက်ဒရစ်က ၃ ရာသီဆက် ချန်ပီယံ ဖြစ်မယ့် အရေး ကနေ တားဆီးသွားနိုင်မလား ဆိုတာ စောင့်ကြည့်ရဖို့ ရှိနေခြင်းနဲ့ အတူ စိတ်ဝင်စားစရာ ကောင်းလာဦးမှာ သေချာပါတယ်။

အာဂျင်တီးနားကို အနိုင်ရပြီး စပိန်တို့ ဗိုလ်စွဲခဲ့တဲ့ သမိုင်းတစ်လျှောက် အကြီးမားဆုံး ကမ္ဘာ့ဖလား ပြိုင်ပွဲ အပြီး မှာတော့ ၂၀၂၆-၂၇ ရာသီ လိဂ်ပြိုင်ပွဲတွေ ပြန်လည် စတင်တော့မှာ ဖြစ်ပါတယ်။ ဥရောပ ထိပ်သီးလိဂ် ၅ ခုထဲမှာ လာလီဂါဟာ စနေနေ့မှာ ပထမဆုံး စတင်မှာဖြစ်ပြီး အာလာဗက်စ်နဲ့ ဂီတာဖေး၊ ဆီဗီလာနဲ့ ဗလက်ကာနိုတို့ စတင် ယှဉ်ပြိုင်ကြရမှာပါ။ အက်တလက်တီကိုမက်ဒရစ် ကတော့ နောက်တစ်ပတ် ဗုဒ္ဓဟူးနေ့မှာ မာလာဂါနဲ့ စတင်ယှဉ်ပြိုင်ရမှာ ဖြစ်ပြီး ရီးရဲလ်မက်ဒရစ်နဲ့ ဘာစီလိုနာတို့ ကတော့ ဒုတိယ သီတင်းပတ်မှ ပွဲထွက်လာကြမှာ ဖြစ်ပါတယ်။

ဟန်ဆီ ဖလစ်ခ်ရဲ့ ဘာစီလိုနာဟာ ၂၀၂၅-၂၆ ရာသီမှာ နှစ်နှစ် ဆက်တိုက် ရမှတ် ကွာဟချက် ကြီးမားစွာနဲ့ ဗိုလ်စွဲခဲ့တာကြောင့် လက်ရှိ လာလီဂါ ချန်ပီယံ အဖြစ် ရှိနေပါတယ်။ ဒါဟာ လီယွန်နယ် မက်ဆီ ထွက်ခွာသွားပြီး နောက်ပိုင်း ၂၀၁၇-၁၈ နဲ့ ၂၀၁၈-၁၉ ရာသီတွေ ပြီးရင် ဘာစီလိုနာတို့ ပထမဆုံး အကြိမ် နှစ်ရာသီဆက် ချန်ပီယံဆုကို ထိန်းသိမ်းနိုင်ခဲ့တာပါ။ ဘာစီလိုနာ အသင်း ၃ ရာသီဆက် လာလီဂါ ဖလား ရယူနိုင်ခဲ့တာဆိုလို့ ၂၀၀၈-၀၉၊ ၂၀၀၉-၁၀ နဲ့ ၂၀၁၀-၁၁ ရာသီတွေတုန်းက ပပ် ဂွါဒီယိုလာရဲ့ လက်ထက် ကိုပဲ ပြန်မြင်ယောင်ကြည့်ရမှာ ဖြစ်ပြီး ဖလစ်ခ် အနေနဲ့ အဲဒီ အောင်မြင်မှုကို ထပ်မံ ပုံတူကူးနိုင်မလား ဆိုတာ စောင့်ကြည့်ရမှာပါ။

လွန်ခဲ့တဲ့ ၂၀၁၁-၁၂ ရာသီတုန်းက ဂွါဒီယိုလာရဲ့ ဘာစီလိုနာကို ပလ္လင်ပေါ် ကနေ ဆွဲချခဲ့သူ ကတော့ ဟိုဆေး မော်ရင်ညိုရဲ့ ရီးရဲလ်မက်ဒရစ်ပဲ ဖြစ်ပါတယ်။ အခုအခါမှာတော့ ‘The Special One’ မော်ရင်ညိုဟာ အသင်း ကနေ ထွက်ခွာသွားခဲ့ အပြီး ၁၃ နှစ် အကြာမှာ ဆန်တီယာဂို ဘာနေဗျူးဆီ ပြန်လည် ရောက်ရှိလာပြီး အဲဒီ စွမ်းဆောင်ရည်ကို ထပ်မံပြသနိုင်ဖို့ ကြိုးပမ်းလာတော့မှာပါ။

မော်ရင်ညိုရဲ့ လက်ထဲမှာ အရည်အသွေးမြင့် ကစားသမားများစွာ ရှိနေပါတယ်။ ကီလီယန် အမ်ဘာပေးနဲ့ ဂျူ့ဒ် ဘယ်လင်ဟမ် တို့ဟာ ကမ္ဘာ့ဖလားမှာ ခြေစွမ်းပြခဲ့သူတွေ ဖြစ်ပြီး ရီးရဲလ်ဟာ ဒီအပြောင်းအရွှေ့မှာ ဘာနာဒို ဆေးလ်ဗား၊ မာ့ခ် ကူကူရယ်လား၊ ဒန်ဇဲလ် ဒမ်းဖရီးစ်၊ အီဘရာဟီမာ ကိုနာတေးနဲ့ ယန် ဒီယိုမန်ဒီ တို့ကို ခေါ်ယူထားပါတယ်။ ဒါ့အပြင် အာဆင်နယ်နဲ့ သတင်းထွက်ခဲ့တဲ့ ဗင်နီးစီးယက်စ် ဂျူနီယာ ကလည်း စာချုပ်သစ် လက်မှတ်ရေးထိုးခဲ့တာကြောင့် အသင်း အတွက် ပိုမို အင်အား တောင့်တင်းသွားစေပါတယ်။

ဒါပေမယ့် ရီးရဲလ်ဟာ ပြီးခဲ့တဲ့ နှစ်ရာသီ ဆက်တိုက် အဓိက ဖလားတစ်လုံးမှ မရရှိခဲ့တာကြောင့် မော်ရင်ညို အနေနဲ့ စိတ်အေးလက်အေး ပျော်ပါးခွင့် ရရှိမှာ မဟုတ်ပါဘူး။ အသင်း အနေနဲ့ ၃ ရာသီဆက် ဖလား လက်မဲ့ ဖြစ်ခဲ့တာဆိုလို့ ၂၀၀၃-၀၄ နဲ့ ၂၀၀၅-၀၆ ကြားမှာပဲ ကြုံတွေ့ခဲ့ဖူးတာပါ။ 

ပြီးခဲ့တဲ့ ၂၀၂၅-၂၆ ရာသီမှာ ဗီယားရီးရဲလ်က အက်တလက်တီကိုမက်ဒရစ်ကို ကျော်လွန်ပြီး အဆင့် ၃ နေရာ ရရှိခဲ့တာကြောင့် စပိန် ထိပ်သီး ၃ သင်းရဲ့ စိုးမိုးမှုကို နှစ်နှစ်အတွင်း ဒုတိယအကြိမ်အဖြစ် ရိုက်ချိုးနိုင်ခဲ့ပါတယ်။ ဒါ့အပြင် လာလီဂါဟာ ချန်ပီယံလိဂ် ဝင်ခွင့် တစ်နေရာ ပိုမိုရရှိခဲ့တာကြောင့် ရီးရဲလ် ဘက်တစ်လည်း ချန်ပီယံလိဂ် ဝင်ခွင့် ရရှိခဲ့ပါတယ်။ ဒီ နှစ်သင်းလုံးဟာ ၂၀၂၆-၂၇ ရာသီ မှာလည်း ဥရောပ ဝင်ခွင့် ရရှိဖို့ ထပ်မံ မျှော်လင့်နေကြမှာ အသေအချာပါပဲ။

တစ်ဖက်မှာလည်း ပြီးခဲ့တဲ့ရာသီ တန်းဆင်းဇုန် တိုက်ပွဲဟာ လာလီဂါ သမိုင်းမှာ ပြိုင်ဆိုင်မှု အပြင်းထန်ဆုံး ဖြစ်ခဲ့ပြီး ဆီဗီလာ အသင်း ရုန်းကန်ခဲ့ရသလို ဒီရာသီမှာလည်း ထပ်မံ ရုန်းကန်ရဖွယ် ရှိနေပါတယ်။ တန်းတက်လာတဲ့ အသင်းတွေထဲ မှာတော့ ရေးဆင်း စန်တန်ဒါ၊ ဒီပို့တီဗို လာကိုရူးညားနဲ့ မာလာဂါ တို့ဟာ ဟိုအောက်အထိ ကျဆင်းသွားခဲ့ရ အပြီး နှစ်ပေါင်းများစွာ အကြာမှ လာလီဂါဆီ ပြန်လည် ရောက်ရှိလာတာ ဖြစ်ပါတယ်။

Opta စူပါကွန်ပျူတာရဲ့ အကြိမ် ၁၀,၀၀၀ စိစစ်တွက်ချက်မှုများအရ ၂၀၂၆-၂၇ လာလီဂါ ရာသီ ဘယ်လို ဖြစ်လာနိုင်သလဲ ဆိုတာကို ခန့်မှန်း ဖော်ပြပေးလိုက်ပါတယ်။

 

ကစားသမားသစ်တွေ ဝယ်ယူထားတဲ့ ရီးရဲလ်ထက် ၃ ရာသီဆက် ဗိုလ်စွဲဖို့ ပိုမို ရေပန်းစားနေတဲ့ ဘာစီလိုနာ

မျှော်လင့်ထားတဲ့အတိုင်း ဘာစီလိုနာဟာ ၄၅.၅၅% နဲ့ စူပါကွန်ပျူတာရဲ့ လာလီဂါ ဖလား ရဖို့ ရေပန်းအစားဆုံး အသင်း ဖြစ်နေပါတယ်။ အကယ်၍ ရရှိခဲ့ပါက ဖလစ်ခ်ဟာ ဂွါဒီယိုလာ ပြီးရင် အသင်းကို ကိုင်တွယ်တဲ့ ပထမဆုံး ၃ ရာသီ ဆက်တိုက် လာလီဂါ ဖလား ရယူပေးနိုင်တဲ့ ဒုတိယမြောက် နည်းပြ ဖြစ်လာမှာပါ။

ရောဘတ် လီဝမ်ဒေါစကီးဟာ မေဂျာလိဂ်ဆီ ထွက်ခွာသွားခဲ့ပေမဲ့ ပြီးခဲ့တဲ့ရာသီက လိဂ် ၁၇ ပွဲသာ ပွဲထွက်ခဲ့ရတာပါ။ မန်ယူနိုက်တက် ကနေ အငှားနဲ့ လာကစားစဉ် ၁၅ ဂိုး ဖန်တီးမှု ပြုလုပ်ပေးခဲ့ပြီး ရီးရဲလ်ကို အနိုင်ရတဲ့ ပွဲစဉ်မှာ အံ့ဩဖွယ် ဖရီးကစ်ဂိုး သွင်းယူပေးခဲ့တဲ့ မားကပ်စ် ရက်ရှ်ဖို့ဒ် ထွက်ခွာသွားမှုက ဘာဆာ အတွက် ပိုမို သက်ရောက်မှုရှိနိုင်ပါတယ်။ ဒါပေမယ့် ဘာစီလိုနာဟာ ရက်ရှ်ဖို့ဒ်ရဲ့ နေရာမှာ အစားထိုးဖို့ အင်္ဂလန် အသင်းဖော် အန်သိုနီ ဂေါ်ဒွန်ကို ယူရို သန်း ၈၀ နဲ့ အလျင်အမြန် ခေါ်ယူခဲ့ပါတယ်။ ဂေါ်ဒွန်ရဲ့ ခံစစ် လိုက်ပါနိုင်မှုနဲ့ တိုက်စစ်ဆင်မှုတွေဟာ ရာဖင်ညာ၊ လာမင်း ယာမယ် တို့နဲ့ သဟဇာတ ဖြစ်လာမှာပါ။ ဒါ့အပြင် ဒေါ့မန် တိုက်စစ်မှူးဟောင်း ကာရင်မ် အဒီယီမီကို ခေါ်ယူလိုက်မှု ကလည်း ဘာစီလိုနာရဲ့ တိုက်စစ်ပိုင်းကို ပိုမို တောင့်တင်းသွားစေပါတယ်။

ရီးရဲလ်မက်ဒရစ်ကတော့ ၃၀.၉၆% နဲ့ ဘာစီလိုနာကို စိန်ခေါ်နိုင်ခြေ ရှိနေပါတယ်။ မော်ရင်ညိုဟာ ဥက္ကဋ္ဌ ဖလော်ရင်တီနို ပီရက်ဇ်ထံမှ အပြည့်အဝ ပံ့ပိုးမှု ရရှိထားပြီး လိုက်ပ်ဇစ် ကနေ ဒီယိုမန်ဒီကို ယူရို သန်း ၁၄၀ နဲ့ ခေါ်ယူခဲ့တာဟာ ဒီနွေရာသီရဲ့ အထူးခြားဆုံး အပြောင်းအရွှေ့ ဖြစ်ခဲ့ပါတယ်။ ရီးရဲလ် တိုက်စစ်မှူး အမ်ဘာပေး ဟာလည်း ဒီနွေရာသီမှာ ကမ္ဘာ့ဖလား သမိုင်းတစ်လျှောက် ဂိုးအများဆုံးသွင်းသူ ဖြစ်လာခဲ့ပြီးနောက် လာလီဂါ ဂိုးသွင်း အများဆုံးဆုကို ၃ ရာသီ ဆက်တိုက် ရယူနိုင်မယ့် မှတ်တမ်းကို ပစ်မှတ်ထားနေပါတယ်။

အက်တလက်တီကိုမက်ဒရစ် ကတော့ လာလီဂါ ချန်ပီယံ ဖြစ်ဖို့ ၈.၆၄% နဲ့ တတိယ ရေပန်းအစားဆုံး ဖြစ်နေပါတယ်။ နည်းပြ ဒီယိုဂို ဆီမြွန်နီဟာ အဲလက်ဆန်ဒရို ဂရီမဲလ်ဒို၊ မော်တန် ဟူးလ်မန်းနဲ့ လီကန်အင်း တို့ကို ခေါ်ယူကာ ကစားကွက် ဖန်တီးမှု အပိုင်းကို သိသိသာသာ မြှင့်တင်ထားပါတယ်။

တခြား ပြင်ပ အသင်းတွေထဲ မှာတော့ ဗီယားရီးရဲလ် (၃.၃%) နဲ့ ရီးရဲလ် ဘက်တစ် (၂.၁%) တို့က ရေပန်းအစားဆုံး စာရင်းမှာ ထိပ်ဆုံးက ဦးဆောင်နေပါတယ်။

 

ဥရောပ ဝင်ခွင့် အတွက် ဗီယားရီးရဲလ်နဲ့ ရီးရဲလ်ဘက်တစ်တို့ ထပ်မံ ကြိုးပမ်းနိုင်ကြဦးမလား

ဘာစီလိုနာ (၈၈.၃၄%) နဲ့ ရီးရဲလ်မက်ဒရစ် (၈၁.၀၆%) တို့ဟာ ထိပ်ဆုံး ၄ သင်း အတွင်း ဝင်ရောက်ဖို့ သေချာသလောက် ရှိနေပြီး အက်တလက်တီကို မက်ဒရစ်ကတော့ ၄၈.၅၇% ရှိနေပါတယ်။ ဒါ့အပြင် တခြားအသင်းတွေရဲ့ ထိပ်ဆုံး ၄ သင်း အတွင်း ဝင်ရောက်နိုင်ချေမှာ ဗီယားရီးရဲလ် ၂၉.၅၁%၊ ရီးရဲလ် ဘက်တစ် ၂၂.၉၇%၊ ဗလင်စီယာ – ၁၇.၆၇%၊ ဗလက်ကာနို – ၁၆.၆၉%၊ ဆဲလ်တာဗီဂို ၁၆.၂၈%၊ အသလက်တစ် ဘီလ်ဘာအို ၁၁.၆၉%၊ ရီးရဲလ် ဆိုစီဒက် ၁၀.၉၃% ဆိုပြီး အသီးသီး သတ်မှတ်ခံထားရပါတယ်။

 

တန်းဆင်းဇုန်နဲ့ နီးကပ်ခဲ့ပြီးနောက် ဆီဗီလာ တို့ရဲ့ ခေတ်ကုန်ဆုံးတော့မလား

တန်းမဆင်းရရေး တိုက်ပွဲ မှာတော့ ၁၂ သင်းအထိ တန်းဆင်းနိုင်ချေ ၁၀% အထက် ရှိနေပြီး ၆ သင်း ကတော့ ၂၅% အထက်မှာ ရှိနေပါတယ်။ ဒုတိယတန်း ကနေ တန်းတက်လာတဲ့ ဒီပို့တီဗို အသင်းဟာ ၂၉.၁၆% နဲ့ တန်းဆင်းရနိုင်ခြေ အများဆုံး ဖြစ်နေပါတယ်။ အဲလ်ချီ အသင်းက ၂၈.၃၆% နဲ့ ဒုတိယ နေရာမှာ ရှိနေပြီး ဥရောပဖလား ၇ ကြိမ်ရ ဆီဗီလာ အသင်း ကတော့ ၂၇.၇၂% နဲ့ တန်းဆင်းဖို့ ရေပန်းအစားဆုံး တတိယအသင်း ဖြစ်နေပါတယ်။

တခြား တန်းဆင်းနိုင်ချေ ရှိနေသည့် အသင်းတွေ အဖြစ်တော့ ရေးဆင်း စန်တန်ဒါ ၂၆.၈၇%၊ အက်စပန်ညို ၂၆.၄၈%၊ မာလာဂါ ၂၅.၂၆%၊ လီဗန်တေး ၁၉.၄၆%၊ ဂီတာဖေး ၁၈.၄၉%၊ အလာဗက်စ် ၁၈.၄၇%၊ အိုဆာဆူနာ – ၁၇.၁၇% ဆိုပြီး ရှိနေကြပါတယ်။

   

●●●

နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS

အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်

ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်