ဆွစ်ဇာလန်နဲ့ ကနေဒါ အသင်းတို့ဟာ အုပ်စု (B) ကနေ ကမ္ဘာ့ဖလား ၃၂ သင်းအဆင့် ရှုံးထွက်ပွဲစဉ်ကို တက်ရောက်ဖို့ သေချာနေခဲ့တာ ဖြစ်ပါတယ်။ ဒါပေမယ့်လည်း အိမ်ရှင် ကနေဒါ အသင်း အတွက် ကတော့ ကိုယ့်မြေကိုယ့်ရေမှာ ဆက်ကစားရမယ့် အိမ်ကွင်း အားသာချက် ဆုံးရှုံးသွားခဲ့ရပါတယ်။
ကမ္ဘာ့ဖလား ပူးတွဲ အိမ်ရှင် ကနေဒါ အသင်းဟာ အုပ်စု ဗိုလ်လုပွဲ အဖြစ် ကစားခဲ့တဲ့ ပွဲစဉ်မှာ ဆွစ်ဇာလန် အသင်းကို ၂-၁ ရလဒ်နဲ့ အရှုံးပေးလိုက်ရတာကြောင့် အုပ်စု ဒုတိယနဲ့သာ ကျေနပ်ခဲ့ရပါတယ်။ ပွဲမတိုင်ခင် ကတည်းက နှစ်သင်းစလုံးဟာ ရမှတ် ၄ မှတ်စီနဲ့ ရှုံးထွက် အဆင့်တက်ဖို့ သေချာသလောက် ရှိနေခဲ့တာပါ။
ဒါပေမယ့် နည်းပြ ဂျက်ဆီ မာ့ရှ်ရဲ့ ကနေဒါ အသင်းသာ ဒီပွဲမှာ သရေ တစ်မှတ် ရခဲ့ရင် ၃၂ သင်း အဆင့် ပွဲစဉ် အပြင် နောက်တက်မယ့် ၁၆ သင်းအဆင့် ပွဲစဉ်တွေ ကိုပါ ဗန်ကူးဗားမြို့မှာ ရှိတဲ့ သူတို့ရဲ့ အိမ်ကွင်းမှာ ဆက်လက် ကစားခွင့်ရမှာ ဖြစ်ပါတယ်။ အခုတော့ အုပ်စုဒုတိယ ဖြစ်သွားခဲ့တာကြောင့် အမေရိကန်နိုင်ငံ၊ လော့စ်အိန်ဂျလိစ်မြို့ဆီ သွားရောက်ပြီး အုပ်စု (A) ရဲ့ ဒုတိယရတဲ့ အသင်းနဲ့ ရင်ဆိုင်ရတော့မှာ ဖြစ်ပါတယ်။ တတိယရတဲ့ ဘော့စနီးယား အသင်းနဲ့ ကနေဒါဟာ ရမှတ်တူပေမယ့် ဂိုးကွာခြားချက် အသာနဲ့ ဒုတိယရခဲ့တာပါ။
ပထမပိုင်းမှာတော့ ကစားပုံက အေးစက်နေခဲ့ပြီး ဆွစ်ဇာလန် တိုက်စစ်မှူး ဘရီးလ် အမ်ဘိုလိုရဲ့ ကန်ချက်ကို ကနေဒါ ဂိုးသမား မက်ဆီမီ ခရီပို လက်စွမ်းပြ ကာကွယ်နိုင်ခဲ့တာက လွဲရင် နှစ်ဖက်စလုံး ဂိုးရလောက်တဲ့ အထိ ရင်ခုန်စရာ မရှိခဲ့ပါဘူး။ ဒါပေမယ့် ဒုတိယပိုင်းအစ မှာတော့ ပွဲက ရုတ်တရက် အရှိန်မြင့်တက်သွားခဲ့ပါတယ်။ ဒုတိယပိုင်း စလို့ ၃၉ စက္ကန့်ပဲ ရှိသေးတဲ့ အချိန်မှာ ဆွစ်ဇာလန်ရဲ့ ရုဘင် ဗားဂတ်စ်က ဂျိုဟန် မန်ဇမ်ဘီရဲ့ ပေးပို့မှု ကနေ တစ်ဆင့် အနီးကပ်တိုင်ဘေးကို လှပစွာ ကန်သွင်းပြီး အဖွင့်ဂိုး ရယူပေးခဲ့ပါတယ်။ ဒီဂိုးဟာ ၂၀၁၀ ကမ္ဘာ့ဖလား နောက်ပိုင်း ဒုတိယပိုင်းမှာ အစောဆုံး သွင်းယူနိုင်ခဲ့တဲ့ သမိုင်းဝင် သွင်းဂိုးလည်း ဖြစ်လာခဲ့ပါတယ်။
နောက်ထပ် ၁၁ မိနစ် အကြာ မှာတော့ ကနေဒါ နောက်ခံလူ ဖိုဂါရိုးလ်ရဲ့ အမှားကနေ တစ်ဆင့် အမ်ဘိုလိုက ဘောလုံးလုယူပြီး ကွင်းလယ်လူ မန်ဇမ်ဘီဆီ ချပေးခဲ့ရာ မှာတော့ မန်ဇမ်ဘီက ဒုတိယဂိုး အဖြစ် ကန်သွင်းယူခဲ့ပါတယ်။ ဒီဂိုးဟာ ကနေဒါ ဂိုးသမား ခရီပိုရဲ့ လက်ကြားထဲ ကနေ လျှောထွက်ပြီး ဂိုးထဲ ဝင်သွားခဲ့တာမို့ ကနေဒါ အတွက် စိတ်ပျက်စရာ ကောင်းခဲ့ပါတယ်။
ပွဲချိန် ၇၆ မိနစ် မှာတော့ ကနေဒါ အသင်း လူစားဝင် ကစားသမား ပရိုမစ် ဒေးဗစ်က နာသန် ဆာလီဘာရဲ့ အကွက်မြင်မြင် ဖန်တီးပေးမှု ကနေ ချေပဂိုး တစ်ဂိုး ပြန်သွင်းနိုင်ခဲ့လို့ ပွဲက ပြန်လည် အသက်ဝင်လာခဲ့ပါတယ်။ ဒါပေမယ့် ကျန်တဲ့ မိနစ်တွေမှာ ကနေဒါတို့ အခွင့်အရေး တချို့ ရခဲ့ပေမယ့် အသုံးမချနိုင်ခဲ့တာကြောင့် ဆွစ်ဇာလန်ကို အရှုံးပေးလိုက်ရတာ ဖြစ်ပါတယ်။
ဒီပွဲမှာ ၁ ဂိုးသွင်း၊ ၁ ဂိုး ဖန်တီးပေးခဲ့တဲ့ ဆွစ်ဇာလန်ရဲ့ ဖရိုင်းဘတ် ကလပ်က အသက် ၂၁ နှစ်အောက် လူငယ် ကြယ်ပွင့် ဂျိုဟန် မန်ဇမ်ဘီ ကတော့ စံချိန်ကောင်းတွေ ပိုင်ဆိုင်သွားခဲ့ပါတယ်။ သူဟာ လက်ရှိ ကမ္ဘာ့ဖလား ပြိုင်ပွဲ တစ်ခုတည်းမှာ သွင်းဂိုး (၂ ဂိုး)၊ ဖန်တီးမှု (၂ ကြိမ်) နဲ့ စုစုပေါင်း ဂိုးပါဝင် ပတ်သက်မှု ၄ ကြိမ် အထိ ပြုလုပ်နိုင်ခဲ့တာပါ။ ဒါဟာ ၂၁ ရာစု အတွင်းမှာ အသက် ၂၁ နှစ်အောက် ကစားသမားတွေထဲက ၂၀၁၈ တုန်းက ကီလီယန် အမ်ဘာပေးနဲ့ ၂၀၁၀ တုန်းက သောမတ်စ် မူလာတို့ ပြီးရင် ဒီလိုစံချိန်မျိုး ရနိုင်ခဲ့တဲ့ တတိယမြောက် ကစားသမား အဖြစ် သမိုင်းမှတ်တမ်း ဝင်သွားခဲ့တာလည်း ဖြစ်ပါတယ်။
ကနေဒါ အသင်း အနေနဲ့ ကမ္ဘာ့ဖလား သမိုင်းတစ်လျှောက် ရှုံးထွက်အဆင့်ကို ပထမဆုံးအကြိမ် အဖြစ် တက်လှမ်းနိုင်ခဲ့လို့ သမိုင်းဝင်ခဲ့ပေမယ့် သူတို့ အိမ်ကွင်းမှာ ဆက်ကစားခွင့် မရတော့တာ ကတော့ ကြီးမားတဲ့ ထိခိုက်မှု တစ်ခုပါပဲ။ ပွဲပြီးစာရင်းဇယားတွေအရ ကနေဒါက ဆွစ်ဇာလန်ထက် ဂိုးကန်သွင်းခွင့် (၁၃ ကြိမ်) ပိုရခဲ့သလို ဂိုးရနိုင်ချေ မျှော်မှန်းချက် (xG) မှာလည်း ၁.၃၄ နဲ့ ဆွစ်ဇာလန်ရဲ့ ၁.၀၆ ထက် သာလွန်ခဲ့ပါတယ်။ ဒါပေမယ့် နည်းပြ မူရတ် ယာကင်ရဲ့ ဆွစ်ဇာလန် အသင်း ကတော့ ရတဲ့ အခွင့်အရေးတွေကို ပိုမိုပြတ်သားစွာ အသုံးချနိုင်ခဲ့တာကြောင့် အုပ်စု ပထမနေရာနဲ့ ထိုက်ထိုက်တန်တန် ရှုံးထွက်အဆင့်ကို တက်လှမ်းသွားနိုင်ခဲ့တာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
