အီတလီ ကတော့ ၂၀၂၆ ကမ္ဘာ့ဖလား ဝင်ခွင့် နောက်ဆုံး အဆင့် ပလေးအော့ဖ် ဗိုလ်လုပွဲ အဖြစ် ဘော့စနီးယားနဲ့ ရင်ဆိုင်ရမှာ ဖြစ်ပါတယ်။ ဒီပွဲမတိုင်ခင် အီတလီ နည်းပြ ဂန်နာရို ဂတ်တူဆိုနဲ့ ဘော့စနီးယား တိုက်စစ်မှူး အီဒင် ဒီဂျက်ကို တို့ အကြားမှာ အပြန်အလှန် ပြောဆိုမှုတွေ ရှိနေပါတယ်။
ဒီကနေ့ည ကမ္ဘာ့ဖလား ဝင်ခွင့် တစ်နေရာ အတွက် ဘော့စနီးယားနဲ့ ရင်ဆိုင်ရမယ့် ပွဲမတိုင်ခင် အီတလီ နည်းပြ ဂတ်တူဆိုက ဒီပွဲရဲ့ ကြီးမားတဲ့ အရေးပါမှုကို အပြည့်အဝ နှစ်ခြိုက်သဘောကျနေပြီး “ဘောလုံးလောကသား မှန်ရင် ဒီလိုအခိုက်အတန့်မျိုးတွေ အတွက် အသက်ရှင်နေကြတာ” လို့ အခိုင်အမာ ပြောကြားလိုက်တာ ဖြစ်ပါတယ်။
အီတလီ အသင်းဟာ ပလေးအော့ဖ် ဆီမီးဖိုင်နယ်မှာ မြောက်အိုင်ယာလန်ကို ၂-၀ နဲ့ အနိုင်ယူပြီး ဇန်နီကာမြို့မှာ ဘော့စနီးယားနဲ့ ရင်ဆိုင်ရမှာ ဖြစ်ပြီး၊ ဘော့စနီးယား ကတော့ ဝေးလ်စ် အသင်းကို ပင်နယ်တီနဲ့ အနိုင်ယူ ကျော်ဖြတ်လာခဲ့တာ ဖြစ်ပါတယ်။ မြောက်အိုင်ယာလန်နဲ့ ပွဲမှာ ဆန်ဒရို တိုနာလီက အီတလီ အတွက် ဦးဆောင်ဂိုး သွင်းခဲ့ပြီး မွိုက်စ် ကင်းန်က ဒုတိယဂိုး သွင်းယူခဲ့ပါတယ်။ မွိုက်စ် ကင်းန်ဟာ ဂန္ထဝင် တိုက်စစ်မှူး ရှီလာချီ နောက်ပိုင်း အီတလီ အတွက် ၅ ပွဲ ဆက်တိုက် ဂိုးသွင်းနိုင်တဲ့ ပထမဆုံး ကစားသမား ဖြစ်လာခဲ့ပါတယ်။
အီတလီ အသင်းဟာ ၂၀၂၁ ခုနှစ်မှာ ယူရို ချန်ပီယံ ဖြစ်ခဲ့ပေမယ့် ၂၀၁၈ နဲ့ ၂၀၂၂ ကမ္ဘာ့ဖလား ပြိုင်ပွဲ နှစ်ခုစလုံးကို လွဲချော်ခဲ့တာကြောင့် ဂတ်တူဆိုက သူ့ရဲ့ အသင်းကို ဒီအခွင့်အရေးမှာ အစွမ်းပြစေချင်နေပါတယ်။ “ဘောလုံးလောကထဲမှာ ရှိတဲ့ ဘယ်သူမဆို ဒီလို အခိုက်အတန့်မျိုးတွေ အတွက် အသက်ရှင်နေကြတာပါ။ ကျွန်တော့် အနေနဲ့တော့ စိတ်လှုပ်ရှားမှုရဲ့ အရသာကို ခံစားနေရတယ်၊ ဒါထက် ကောင်းတာ ဘာမှ မရှိပါဘူး။ အကယ်၍ ခင်ဗျားမှာ ဒီလို စိတ်လှုပ်ရှားမှုမျိုး မရှိတော့ဘူး ဆိုရင် ဘောလုံးဖိနပ်ကို ချိတ်လိုက်ပါတော့၊ ဒါမှမဟုတ် နည်းပြ ဆိုရင်လည်း အိမ်ပြန်နားလိုက်ပါတော့။” လို့ ဆိုပါတယ်။
“ဒီပွဲက ဘယ်လောက်အထိ အရေးပါတယ်ဆိုတာ ကျွန်တော်တို့ သိပါတယ်။ အီတလီ အသင်းဟာ ပြီးခဲ့တဲ့ ကမ္ဘာ့ဖလား နှစ်ခုစလုံးကို မတက်နိုင်ခဲ့ဘူး ဆိုတာ ကိုလည်း ကောင်းကောင်း သတိပြုမိပါတယ်။ ဒါပေမယ့် ကျွန်တော် တို့မှာ ရှိတဲ့ စွမ်းအင် အားလုံးကို ကွင်းထဲမှာပဲ အသုံးချရမှာဖြစ်ပြီး ကြိုတင်ပြီး ဖြုန်းတီးမပစ်ဖို့ လိုပါတယ်။”
“ပြီးခဲ့တဲ့ ၇ လအတွင်းမှာ အသင်းက အများကြီး တိုးတက်လာခဲ့ပါတယ်။ ကျွန်တော် တို့ရဲ့ ကစားပုံက ကြည့်လို့ မလှချင် မလှပါလိမ့်မယ်။ ဒါပေမယ့် ကိစ္စမရှိပါဘူး။ ကျွန်တော် တို့ရဲ့ သမိုင်းကြောင်းအရ စိတ်ဓာတ်ခိုင်မာမှု၊ ဆာလောင်မှုနဲ့ အခက်အခဲတွေကို ခံနိုင်ရည်ရှိမှုတို့ကြောင့်သာ ဒီအကျီကို ဝတ်ဆင်ထားတဲ့ ကျွန်တော်တို့ အသင်းသားတွေဟာ မမျှော်လင့်ထားတဲ့ အောင်မြင်မှုကြီးတွေကို ရယူနိုင်ခဲ့တာပါ။ ဒါကြောင့် အဲ့ဒီ စိတ်ဓာတ်တွေဟာ ကျွန်တော် တို့မှာ မရှိမဖြစ် လိုအပ်ပါတယ်။” လို့ ဂတ်တူဆိုက Sky Sport Italia ကို ပြောကြားခဲ့ပါတယ်။
တစ်ဖက် မှာတော့ အသက် ၄၀ အရွယ် တိုက်စစ်မှူး အီဒင် ဒီဂျက်ကိုက ဝေးလ်စ်နဲ့ ပွဲမှာ ချေပဂိုး သွင်းခဲ့ပြီး ဘော့စနီးယား အသင်း ပင်နယ်တီမှာ ၄-၂ နဲ့ အနိုင်ရအောင် စွမ်းဆောင်ပေးခဲ့ပါတယ်။ အီတလီ ကစားသမားတွေ ဖြစ်တဲ့ ဒီမာကိုနဲ့ ဗီကာရီယို တို့က ဝေးလ်စ် ရှုံးသွားတာကို အောင်ပွဲခံခဲ့ကြတဲ့ အပေါ် ဒီဂျက်ကိုက ဒါဟာ အီတလီ အသင်း အတွင်း ပြဿနာရှိနေတဲ့ လက္ခဏာလို့ ယူဆနေပါတယ်။
“ဘာတွေဖြစ်ခဲ့လဲ ဆိုတာ ကျွန်တော်တို့အားလုံး မြင်ခဲ့ရပါတယ်။ ဒါဟာ သာမန်ကိစ္စ တစ်ခု လို့ပဲ ကျွန်တော် ပွင့်ပွင့်လင်းလင်း ပြောပါရစေ။ လူတိုင်းမှာ ကိုယ်နှစ်သက်ရာ ရှိကြတာပဲလေ။ ကျွန်တော့် အတွက် ဆိုရင်လည်း ဗိုလ်လုပွဲမှာ အီတလီနဲ့ မတွေ့ချင်ခဲ့တာမျိုး ဖြစ်နိုင်တာပဲ။ ဒါပေမယ့် ကျွန်တော်က သူတို့နဲ့ ကစားရမှာ ဖြစ်လို့ သူတို့ ရှုံးတာကို လိုက်ပြီး အောင်ပွဲခံနေမှာ မဟုတ်ပါဘူး။”
“အီတလီက ဘာကြောင့် ဝေးလ်စ်မှာ မကစားချင်တာလဲ ဆိုတာ ကျွန်တော် မသိပါဘူး။ ကျွန်တော်တို့ ကတော့ ဝေးလ်စ်ကို ဘာမှမကြောက်ဘဲ သွားကစားခဲ့ပြီး အနိုင်ရခဲ့ပါတယ်။ အီတလီလို အသင်းမျိုးက ဝေးလ်စ် ဒါမှမဟုတ် ဘော့စနီးယားကို ဘာလို့ ကြောက်နေရတာလဲ။ သူတို့မှာ ကမ္ဘာ့ဖလား ၄ ကြိမ် ရထားတဲ့ အံ့သြစရာကောင်းတဲ့ အသင်း ရှိပါတယ်။ အကယ်၍ သူတို့က ဝေးလ်စ်မှာ ကစားရမှာကို ကြောက်နေတယ် ဆိုရင်တော့ တစ်ခုခု မှားယွင်းနေပါပြီ။” လို့ ဒီဂျက်ကိုက ပြန်လည် တုံ့ပြန်ခဲ့ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
