ဒီနွေရာသီမှာ ပရီးမီးယားလိဂ် ကလပ် မန်ချက်စတာယူနိုက်တက်ရဲ့ အကြီးအကျယ် ပြုပြင် ပြောင်းလဲမှုတွေက ပုံပေါ်လာနေပြီ ဖြစ်ပေမယ့် စိုးရိမ်စရာ အခြေအနေ တချို့ ကတော့ ရှိနေဆဲ ဖြစ်ပါတယ်။
ဘယ်လ်ဂျီယံ လက်ရွေးစင် ကွင်းလယ်လူ ယူရီ တေးလီမန့်စ်ဟာ မန်ချက်စတာ ယူနိုက်တက်ကို ထူးခြားတဲ့ ကလပ် အသင်းကြီးလို့ ချီးမွမ်း ပြောဆိုခဲ့ပြီး အသင်းနဲ့ အတူ အကြီးမားဆုံး ဆုဖလားတွေ ရယူနိုင်ဖို့ ကြိုးစားသွားမယ် ဆိုတဲ့ သူ့ရဲ့ ဆန္ဒကို ထုတ်ဖော် ပြောကြားခဲ့ပါတယ်။
အက်စတွန်ဗီလာ ကစားသမားဟောင်း ဖြစ်တဲ့ တေးလီမန့်စ်ဟာ ဒီအပတ်ထဲမှာတင် မန်ချက်စတာယူနိုက်တက်ရဲ့ ပစ်မှတ် အဖြစ် လူသိရှင်ကြား ထွက်ပေါ်လာခဲ့တာပါ။ ဒါဟာ အတ္တလန္တာက ဘရာဇီးလ် ကွင်းလယ်လူ အီဒါဆင်ကို ခေါ်ယူဖို့ အကြိုသဘောတူညီချက် ရထားခဲ့ပေမယ့် ဒုတိယအကြိမ် ဆေးစစ်ချက်မှာ ပျက်ပြားသွားခဲ့ရပြီးနောက် အခုလို ဖြစ်လာခဲ့တာပါ။ သူ့ရဲ့ စာချုပ်ပါ လျော်ကြေး ပေါင် ၃၅ သန်းက ဗီလာ အသင်းနဲ့ တိုက်ရိုက် ဆွေးနွေးစရာ မလိုဘဲ အမြန်ဆုံး အဆုံးသတ်နိုင်ခဲ့တာကြောင့် တေးလီမန့်စ်နဲ့ ဆွေးနွေးမှုတွေက သိပ်ပြီး ခက်ခက်ခဲခဲ မရှိခဲ့ဘူးဆိုတာ သိသာစေပါတယ်။
တေးလီမန့်စ်ရဲ့ ကြုံးဝါး ပြောဆိုမှု
အသက် ၂၉ နှစ် အရွယ် ကွင်းလယ်လူ တေးလီမန့်စ်က ၅ နှစ် သက်တမ်းရှိ စာချုပ်ပေါ်မှာ လက်မှတ် ရေးထိုး အပြီးမှာ “မန်ချက်စတာ ယူနိုက်တက်ကို လာခွင့်ရလို့ ဘယ်လောက်တောင် ဂုဏ်ယူမိလဲ ဆိုတာ စကားလုံးနဲ့ ဖော်ပြဖို့တောင် ခက်ပါတယ်။ ဒီလို ထူးခြားတဲ့ ကလပ် အသင်းကြီးနဲ့ စာချုပ်ချုပ်ရတာ တကယ်ကို မယုံနိုင်စရာပါပဲ။ ဒါဟာ ကျွန်တော် ဘောလုံးကို စတင်မြတ်နိုးကတည်းက နှစ်ပေါင်း များစွာ ကြိုးစားလာခဲ့ရတဲ့ အသီးအပွင့်ပါပဲ။ ကျွန်တော် ဘောလုံးလောကမှာ အောင်မြင်မှုတွေ ကြုံတွေ့ဖူးပြီးသား ဖြစ်လို့ နောက်ထပ် အောင်မြင်မှုတွေ ရယူနိုင်ဖို့ ပိုပြီးတော့တောင် စိတ်အား ထက်သန်နေပါတယ်။ အသင်းမှာ ရှိတဲ့သူတိုင်းရဲ့ ရည်မှန်းချက်က ရှင်းပါတယ်။ လာမယ့် နှစ်တွေမှာ အကြီးမားဆုံး ဆုဖလားတွေကို အတူတူ အရယူသွားမှာပါ”လို့ ရင်ဖွင့်ပြောကြားခဲ့ပါတယ်။
မန်ချက်စတာယူနိုက်တက်ရဲ့ ဘောလုံးဒါရိုက်တာ ဂျေဆန် ဝေလ်ကော့စ် ကလည်း “အသင်းကြီးတွေကို စိန်ခေါ်နိုင်မယ့် အသင်း တစ်သင်းကို ကျွန်တော်တို့ ဆက်လက် တည်ဆောက်နေချိန်မှာ ကွင်းတွင်းကော၊ အဝတ်လဲခန်းထဲမှာပါ သြဇာလွှမ်းမိုးမှုနဲ့ အတွေ့အကြုံရှိတဲ့ ကစားသမားမျိုးကို ကြိုဆိုခွင့်ရလို့ ဝမ်းမြောက်မိပါတယ်။” လို့ တေးလီမန့်စ်ရဲ့ ရည်မှန်းချက်ကို ထောက်ခံပြီး ပြောဆိုခဲ့ပါတယ်။
လက်ရှိ လူစာရင်းနဲ့ မန်ချက်စတာယူနိုက်တက် ဆုဖလားကြီးတွေ ရနိုင်ပါ့မလား
နည်းပြ မိုက်ကယ် ကာရစ်ခ်ဟာ ပြီးခဲ့တဲ့ ရာသီဝက်နီးပါး ဖြစ်တဲ့ ပရီးမီးယားလိဂ် နောက်ဆုံး ၁၇ ပွဲမှာ မန်ချက်စတာယူနိုက်တက်ကို တာဝန်ယူ ကိုင်တွယ်ခဲ့ပါတယ်။ အဲဒီ ငါးလတာ ကာလ အတွင်း သရဲနီတွေဟာ အာဆင်နယ်၊ မန်စီးတီးနဲ့ လစ်ဗာပူးလ် တို့ကို အနိုင်ယူခဲ့ပြီး ရမှတ် ၃၉ မှတ် အထိ ရယူနိုင်ခဲ့တာကြောင့် အဲဒီအချိန်အတော အတွင်းမှာ တခြား အသင်းတွေထက် ရမှတ် အများဆုံး ရခဲ့တဲ့ အသင်း ဖြစ်ခဲ့ပါတယ်။
ဒီအချက်အလက်တွေကို ကြည့်ရင် မန်ချက်စတာယူနိုက်တက် ကစားသမားတွေ အနေနဲ့ ဘာလို့ ၂၀၂၆-၂၇ ရာသီမှာ ပရီးမီးယားလိဂ် ချန်ပီယံဆုကို ပေါ်ပေါ်တင်တင် မျှော်မှန်းနေကြလဲ ဆိုတာ နားလည်နိုင်ပါတယ်။ ဒါပေမယ့် လက်တွေ့မှာတော့ ထင်သလောက် မလွယ်ကူလှပါဘူး။ ပြီးခဲ့တဲ့ ရာသီက မန်ချက်စတာယူနိုက်တက်နဲ့ နည်းပြ မိုက်ကယ် ကာရစ်ခ် တို့ဟာ ထူးခြားတဲ့ အခြေအနေတစ်ခု အောက်မှာ ရှိနေခဲ့တာပါ။ ဥရောပပြိုင်ပွဲတွေ ကစားစရာ မလိုသလို၊ ပြည်တွင်းဖလား ပြိုင်ပွဲ နှစ်ခုစလုံး ကနေ စောစောစီးစီး ပြုတ်သွားခဲ့တာကြောင့် အဲဒီ ပရီးမီးယားလိဂ် ၁၇ ပွဲ ကိုပဲ အပြည့်အဝ အာရုံစိုက်ခွင့်ရခဲ့ပါတယ်။ ဒါကြောင့်လည်း လု့ခ်ရှောနဲ့ ကတ်စ်မဲရိုး တို့လို ကစားသမားတွေဟာ ကြံ့ခိုင်မှုပိုင်း အကန့်အသတ် ရှိပေမယ့် ပွဲတိုင်းမှာ ပုံမှန်ပွဲထွက်ပြီး ခြေစွမ်းပြနိုင်ခဲ့တာ ဖြစ်ပါတယ်။
ဒါပေမယ့် ဒီရာသီမှာတော့ ချန်ပီယံလိဂ်မှာ အနည်းဆုံး ၈ ပွဲ ပို ကစားရတော့မှာ ဖြစ်သလို၊ အရင်ကလို ခြေစွမ်းပြခဲ့တဲ့ ကတ်စ်မဲရိုး ကလည်း အသင်းမှာ မရှိတော့ပါဘူး။ တေးလီမန့်စ် ကိုတော့ အသက်အရွယ် ရလာတဲ့ ဘရာဇီးလ် ကြယ်ပွင့်ရဲ့ နေရာမှာ အစားထိုးဖို့ ခေါ်ယူခဲ့တာ ဖြစ်ပေမယ့် ကစားဟန်ချင်းတော့ မတူပါဘူး။
ဗီလာမှာတုန်းက တေးလီမန့်စ်ဟာ ကွင်းလယ် အဖျက်ပိုင်းမှာ ကြိုးစားကစားခဲ့ပေမယ့် သူ့ရဲ့ အကောင်းဆုံး စွမ်းဆောင်ရည်က ဘောလုံးပေးပို့မှု အပိုင်း ဖြစ်ပါတယ်။ မန်ချက်စတာယူနိုက်တက် အသင်းရဲ့ တရားဝင် ထုတ်ပြန်ချက်မှာ ဖော်ပြထားသလိုပဲ တိုက်စစ်မှူးတွေနဲ့ ကွင်းလယ်လူတွေထဲမှာ တေးလီမန့်စ်ဟာ ပရီးမီးယားလိဂ် အတွင်း ဘောလုံးပေးပို့မှု ၁၀၀ တိုင်းမှာ ပြိုင်ဘက်ရဲ့ ခံစစ်လိုင်းတွေကို အများဆုံး ဖောက်ထွက်နိုင်ခဲ့သလို ဖိအားတွေအောက်မှာ ခံစစ်လိုင်း ဖောက်ထွက်တဲ့ ပေးပို့မှု (Line-breaking passes) အများဆုံး ပြုလုပ်နိုင်တဲ့ ဒုတိယမြောက် ကစားသမားဖြစ်ပါတယ်။
ပြောရရင် တေးလီမန့်စ်ဟာ အကြမ်းပတမ်း ကစားတတ်သူထက် နည်းဗျူဟာမြောက် ကစားကွက်ဖော်တတ်သူ ဖြစ်ပါတယ်။ ဗီလာမှာတုန်း ကတော့ သူ့ဘေးမှာ ဘူဘာကာ ကာမာရာနဲ့ အာမာဒူ အိုနာနာ တို့လို ခံစစ် အကြမ်းပတမ်း ကစားပေးမယ့်သူတွေ ရှိခဲ့ပေမယ့်၊ မန်ချက်စတာယူနိုက်တက် မှာတော့ သူဟာ ဖျက်ထုတ်သူထက် ဖန်တီးရှင် ပိုဆန်တဲ့ ကိုဘီ မိန်းနူးနဲ့ တွဲဖက် ကစားရဖို့ ရှိနေပါတယ်။ ချဲလ်ဆီး ကနေ အန်ဒရီ ဆန်းတို့စ် ရောက်ရှိလာခဲ့ပေမယ့် နည်းပြ ကာရစ်ခ် အနေနဲ့ ကွင်းလယ်လူ သုံးယောက်စလုံးကို ဘရူနို ဖာနန်ဒက်စ်နဲ့ပါ တွဲဖက်ပြီး ကွင်းလယ် ၄ ယောက်တွဲ စနစ်ပြောင်းဖို့ ဆိုတာ ဗျူဟာ အပြောင်းအလဲ အကြီးကြီး လိုအပ်မှာ ဖြစ်ပါတယ်။
မန်ချက်စတာယူနိုက်တက်အနေနဲ့ ဒီနွေရာသီမှာ ကွင်းလယ်လူအသစ် ၃ ယောက် အထိ ဖြည့်တင်းဖို့ မျှော်လင့်ထားကြသလို၊ တိုက်စစ်မှူးနေရာနဲ့ ဘယ်တောင်ပံနေရာတွေ အတွက် အင်အားဖြည့်ဖို့ ကလည်း အဓိက စိုးရိမ်စရာနေရာတွေ အဖြစ် ရှိနေဆဲ ဖြစ်ပါတယ်။ ဒါကြောင့် နည်းပြ ကာရစ်ခ် အနေနဲ့ ပြီးခဲ့တဲ့ရာသီက ခြေစွမ်းကောင်းတွေကို ဆက်ထိန်းထားချင်တယ် ဆိုရင်တော့ အသင်းကို အခုထက်ပိုပြီး အရှိန်အဟုန်နဲ့ ပြန်လည် တည်ဆောက်သွားရဦးမှာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
