အာဆင်နယ်ရဲ့ လစာ အများဆုံး ကစားသမား ဖြစ်လာတဲ့ ဆာကာနဲ့ ပရီးမီးယားလိဂ်ရဲ့ အခွင့်ထူးခံများ

အာဆင်နယ် အကယ်ဒမီထွက် ကြယ်ပွင့် ဘူကာယို ဆာကာ ကတော့ အသင်းနဲ့ ငါးနှစ် သက်တမ်း ရှိတဲ့ စာချုပ်သစ် တစ်ရပ်ကို ချုပ်ဆိုလိုက်ပြီ ဖြစ်ပါတယ်။ ဒီစာချုပ်ကြောင့် သူဟာ အာဆင်နယ်ရဲ့ လုပ်ခ လစာ အများဆုံး ကစားသမား ဖြစ်လာခဲ့ပါတယ်။ ဒါ့အပြင် ဆာကာဟာ စာချုပ်သစ် အရ ပရီးမီးယားလိဂ် တစ်ခုလုံးမှာပါ လုပ်ခလစာ အမြင့်ဆုံး ရရှိတဲ့ ကစားသမား စာရင်းထဲမှာ ပါဝင်လာခဲ့ပြီ ဖြစ်ပါတယ်။

အသက် ၂၄ နှစ် အရွယ် ရှိပြီ ဖြစ်တဲ့ ဆာကာဟာ အောင်မြင်မှုတွေ ရနေပေမယ့် သူငယ်စဉ်က ရပ်ကွက်ထဲမှာ ဘောလုံးကစားခဲ့တဲ့ ဓာတ်ပုံကို သူ့အိမ်က ရေခဲသေတ္တာမှာ ကပ်ထားဆဲ ဖြစ်ပြီး အေးအေးဆေးဆေး နေတတ်တဲ့သူ အဖြစ် လူသိများပါတယ်။ ဒါပေမယ့် သူရဲ့ လက်ရှိ ဝင်ငွေ အခြေအနေ ကတော့ သာမန်လူတွေထက် မကဘဲ တခြား ဘောလုံးသမား အချင်းချင်းကြား မှာတောင် အလွန် မြင့်မားတဲ့ အဆင့် တစ်ခုကို ရောက်ရှိသွားပြီ ဖြစ်ပါတယ်။

 

စာချုပ်သစ်ရဲ့ အသေးစိတ်အချက်အလက်များ

ကြာသပတေးနေ့က ထွက်ပေါ်လာတဲ့ သတင်းတွေ အရ ပရီးမီးယားလိဂ်ကို ဦးဆောင်သူ တို့ဟာ ဆာကာကို ၂၀၃၁ ခုနှစ် နွေရာသီ အထိ အသင်းမှာ ဆက်ရှိနေအောင် စည်းရုံးနိုင်တာပြီ ဖြစ်ပါတယ်။ The Guardian သတင်းဌာနရဲ့ ဖော်ပြချက်အရ ဆာကာရဲ့ အပတ်စဉ် လစာဟာ ပေါင် ၃၀၀,၀၀၀ ဝန်းကျင် အထိ ရှိလာမှာ ဖြစ်ပါတယ်။ ဆာကာရဲ့ ယခင်လစာ ကတော့ တစ်ပတ် လုပ်ခလစာ ပေါင် ၂၀၀,၀၀၀ (၂၀၂၇ မှာ စာချုပ်သက်တမ်း ကုန်ဆုံး) သာ ရရှိခဲ့ပြီး လက်ရှိ လစာ ကတော့ တစ်ပတ်ကို ပေါင် ၃၀၀,၀၀၀ (၅၀ ရာခိုင်နှုန်း အထိ တိုးမြင့်လာခြင်း) အထိ ရရှိမှာ ဖြစ်ပါတယ်။

ဒီစာချုပ်သစ်ကြောင့် ဘူကာယို ဆာကာက အရင်က တစ်ပတ်ပေါင် ၂၈၀,၀၀၀ နဲ့ အသင်းရဲ့ လစာ အများဆုံး ဖြစ်ခဲ့တဲ့ ကိုင် ဟာဗက်ဇ်ကို ကျော်တက်ပြီး အာဆင်နယ်ရဲ့ လစာ အများဆုံး ဖြစ်လာခဲ့ပါတယ်။ မာတင် အိုဒီဂတ် မပါဝင်နိုင်တဲ့ ပွဲစဉ်တွေမှာ အသင်းခေါင်းဆောင် လက်ပတ်ပတ်ပြီး ဦးဆောင်နေရတဲ့ ဆာကာ အတွက် ဒီလစာဟာ ရသင့်ရထိုက်တဲ့ ပမာဏလို့လည်း ဆိုနိုင်ပါတယ်။

 

ရှေ့ဆက်ရမယ့် စိန်ခေါ်မှုတွေနဲ့ အသင်းရဲ့ အဓိက ကစားသမားများ

အာဆင်နယ် အတွက် နောက်ထပ် အရေးကြီးတဲ့ အလုပ်တွေ ကတော့ ၂၀၂၈ မှာ စာချုပ်ကုန်မယ့် မာတင် အိုဒီဂတ်ကို စာချုပ်သစ် ကမ်းလှမ်းဖို့နဲ့ အသင်းရဲ့ အင်ဂျင် ဖြစ်တဲ့ ဒီကလန် ရိုက်စ်ကို စာချုပ်သက်တမ်းတိုးဖို့ပဲ ဖြစ်ပါတယ်။

အသင်းမှာ ရိုက်စ်ရဲ့ အရေးပါမှုဟာ ဆာကာ ထက်တောင် ပိုမိုသိသာတယ်လို့ သုံးသပ်သူအချို့က ဆိုကြပါတယ်။ ဥပမာအားဖြင့် ဆာကာ မကစားနိုင်ရင် နိုနီ မာဒူအေခေလို ကစားသမားမျိုးနဲ့ အစားထိုးနိုင်သလို၊ အိုဒီဂတ် မပါနိုင်ရင်လည်း အီဘာရီချီ အက်ဇေးနဲ့ အစားထိုးလို့ ရနိုင်ပေမယ့်၊ ဒီကလန် ရိုက်စ် ကွင်းထဲမှာ မရှိတဲ့ အခါမှာတော့ အသင်းရဲ့ စွမ်းဆောင်ရည် ကျဆင်းသွားမှုက အစားထိုးလို့ မရနိုင်လောက်အောင် သိသာလွန်းလှပါတယ်။

အာဆင်နယ် အသင်းရဲ့ သမိုင်းမှာ လုပ်ခ လစာ အများဆုံး ရခဲ့သူ ကတော့ ၂၀၂၁ ခုနှစ်မှာ အသင်း ကနေ ခါးခါးသီးသီး ခွဲခွာသွားခဲ့တဲ့ မီဆွတ် အိုဇေးလ် ဖြစ်ပြီး သူဟာ တစ်ပတ်ကို ပေါင် ၃၅၀,၀၀၀ အထိ ရရှိခဲ့ဖူးပါတယ်။

 

ပရီးမီးယားလိဂ် ထိပ်သီးတွေနဲ့ နှိုင်းယှဉ်ချက်

ဆာကာရဲ့ လစာဟာ များပြားလှပေမယ့် လိဂ်ရဲ့ အခြား ထိပ်သီး ကစားသမားတွေနဲ့ နှိုင်းယှဉ်ရင်တော့ အောက်မှာ ရှိနေပါသေးတယ်။ လက်ရှိ ပရီးမီးယားလိဂ်ရဲ့ လုပ်ခလစာ အများဆုံး ကစားသမား‌တွေ ကတော့ အောက်ပါအတိုင်း ဖြစ်ပါတယ်။

၁။ အာလင်း ဟာလန်း (မန်စီးတီး) – ပေါင် ၅၀၀,၀၀၀

၂။ မိုဟာမက် ဆာလာ (လစ်ဗာပူးလ်) – ပေါင် ၄၀၀,၀၀၀ – ၄၈၀,၀၀၀

၃။ ဘူကာယို ဆာကာ (အာဆင်နယ်) – ပေါင် ၃၀၀,၀၀၀

၄။ ဂျက် ဂရီးလစ်ရှ် (မန်စီးတီး) – ပေါင် ၃၀၀,၀၀၀

အာလင်း ဟာလန်းဟာ မန်စီးတီးနဲ့ ၉ နှစ်ခွဲ သက်တမ်း ရှိတဲ့ စာချုပ်ချုပ်ဆိုထားပြီး ပေါင် ၅ သိန်း အထိ ရရှိနေတာ ဖြစ်သလို၊ ဆာလာ ဟာလည်း အပိုဆုကြေးတွေ အပါအဝင် ပေါင် ၄ သိန်းကျော် ရရှိနေပါတယ်။ ဆာကာဟာ အင်္ဂလန် ကစားသမားတွေထဲမှာတောင် လစာ အများဆုံး မဟုတ်သေးပါဘူး။ ဂျက် ဂရီးလစ်ရှ် ဟာလည်း ပေါင် ၃၀၀,၀၀၀ ဝန်းကျင် ရရှိနေပေမယ့် ဒီရာသီမှာ ဒဏ်ရာကြောင့်ရော၊ ပုံစံကောင်း မရတာကြောင့် အင်္ဂလန် အသင်းမှာ ရွေးချယ်မခံရသလို မန်စီးတီး အတွက်လည်း တစ်မိနစ်မှ ကစားပေးထားနိုင်ခြင်း မရှိသေးပါဘူး။

ဒါကို ကြည့်ခြင်းအားဖြင့် လစာကြီးတိုင်း အောင်မြင်မှု ရတာ မဟုတ်ဘူး ဆိုတာကို ပြသနေပါတယ်။ ဂျူဗင်တပ်စ် ဥက္ကဋ္ဌဟောင်း ဂျီယန်နီ အဂ္ဂနယ်လီ ပြောခဲ့ဖူးသလိုပါပဲ။ “ညံ့တဲ့ ဘောလုံးသမားတွေက လစာ ပိုရနေတတ်ပြီး၊ တကယ်တော်တဲ့ သူတွေကတော့ ဘယ်တော့မှ လုံလောက်တဲ့ လစာမျိုး မရရှိနိုင်ကြပါဘူး။” ဆိုပြီးတော့ ဖြစ်ပါတယ်။

   

●●●

နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS

အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်

ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်