ချဲလ်ဆီး အသင်း ပိုင်ရှင် BlueCo ရဲ့ အမှားအယွင်း ရှိခဲ့တဲ့ အပြောင်းအရွှေ့ဗျူဟာကြောင့် စထရာဘိုး အသင်းရဲ့ လူခေါ်ယူမှုပိုင်း ပျက်စီးခဲ့ရတယ်လို့ နည်းပြ ဂယ်ရီ အိုနေးလ် က ဝေဖန်လိုက်ပါတယ်။ BlueCo ကတော့ ပရီးမီးယားလိဂ် ထိပ်သီး ချဲလ်ဆီးနဲ့ လီဂူးဝမ်း ကလပ် စထရာဘိုး တို့ကို ပိုင်ဆိုင်ထားပြီး အပြည့်အဝ ထိန်းချုပ်နေတဲ့ အဖွဲ့အစည်း ဖြစ်ပါတယ်။
စထရာဘိုးဟာ လာမယ့် ရာသီမှာ ဥရောပ ပြိုင်ပွဲ ဝင်ခွင့် ရရှိတော့မှာ မဟုတ်ပေမယ့် နည်းပြ ဂယ်ရီ အိုနေးလ် ကတော့ အသင်းရဲ့ ရလဒ်ပိုင်း ကျဆင်းသွားရခြင်းဟာ ကလပ်ရဲ့ ကစားသမား ခေါ်ယူမှု ဗျူဟာ အမှားတွေကြောင့် ဖြစ်တယ်လို့ အပြစ်တင်လိုက်တာပါ။ ချဲလ်ဆီးနဲ့ စထရာဘိုး အသင်း တို့ရဲ့ ပူးတွဲ ပိုင်ရှင် ဖြစ်တဲ့ BlueCo အဖွဲ့အစည်းဟာ ပြီးခဲ့တဲ့ ဇန်နဝါရီ အပြောင်းအရွှေ့ ဈေးကွက် အတွင်း ပြင်သစ် လီဂူးဝမ်း ကလပ် စထရာဘိုး အသင်းရဲ့ လူအင်အားဖြည့်တင်းမှုကို “ အလွဲလွဲအချော်ချော်” လုပ်ခဲ့တာကြောင့် အသင်းရဲ့ ခြေစွမ်းနဲ့ ရလဒ်ပိုင်း ကျဆင်းသွားရတာ ဖြစ်ကြောင်း ဂယ်ရီ အိုနေးလ်က ယုံကြည်နေတာ ဖြစ်ပါတယ်။
လီယမ် ရိုစီနီယာ တစ်ယောက် ချဲလ်ဆီး အသင်းဆီ ပြောင်းရွှေ့သွားခဲ့ပြီးနောက် အိုနေးလ်ဟာ ၂၀၂၆ ခုနှစ် အစပိုင်းမှာတင် လီဂူးဝမ်း ကလပ်ရဲ့ နည်းပြချုပ် အဖြစ် တာဝန်ယူ ကိုင်တွယ်ခဲ့တာ ဖြစ်ပါတယ်။ သူ တာဝန်ယူခဲ့ပြီး နောက်ပိုင်း စထရာဘိုးက လီဂူးဝမ်း ၁၅ ပွဲမှာ ၆ ပွဲ နိုင်၊ ၅ ပွဲ သရေ၊ ၄ ပွဲ ရှုံး ရလဒ်ထွက်ပေါ်ခဲ့ပြီး နိုင်ပွဲရရှိမှုနှုန်း ၄၀ ရာခိုင်နှုန်း ရှိခဲ့ပါတယ်။ ဒါပေမယ့် တခြားသော ဖလား ပြိုင်ပွဲတွေ မှာတော့ မျှော်လင့်ချက်တွေနဲ့ လွဲချော်ခဲ့ရပါတယ်။
စထရာဘိုး အသင်းဟာ ကွန်ဖရန့်လိဂ် ဆီမီးဖိုင်နယ်မှာ ရေယို ဗလက်ကာနိုကို နှစ်ကျော့ပေါင်း ၂-၀ ဂိုးနဲ့ ရှုံးနိမ့်ပြီး ပြိုင်ပွဲ ကနေ ထွက်ခဲ့ရသလို၊ ပြင်သစ် ဖလား (Coupe de France) ဆီမီးဖိုင်နယ် မှာလည်း နိစ်ကို အိမ်ကွင်းမှာ ၂-၀ နဲ့ ရှုံးနိမ့်ကာ ထွက်ခွာခဲ့ရပါတယ်။
လတ်တလောမှာတော့ သူတို့ဟာ လီဂူးဝမ်း အဆင့် (၈) မှာ ရပ်တည်နေပြီး ဥရောပ ပြိုင်ပွဲ ဝင်ခွင့် ရရှိဖို့ မဖြစ်နိုင်တော့ပါဘူး။ ဒါပေမယ့်လည်း ဇန်နဝါရီလ အတွင်း ကလပ်ရဲ့ ကစားသမား ခေါ်ယူမှုတွေဟာ အသင်းရဲ့ တိုးတက်မှုကို အဟန့်အတား ဖြစ်စေခဲ့ပြီး အသင်းကို ပိုမိုတောင့်တင်းလာစေမယ့် အစား ပိုပြီး အင်အားချည့်နဲ့သွားစေခဲ့တယ်လို့ အိုနေးလ်က ထောက်ပြခဲ့ပါတယ်။
“ကျွန်တော့်မှာ ဗဟိုတိုက်စစ်မှူး နှစ်ယောက် လိုအပ်နေပါတယ်” လို့ အိုနေးလ်က L’Equipe သတင်းစာကို ပြောကြားခဲ့ပါတယ်။ “အသင်းပိုင်ရှင်တွေက လာမယ့် ရာသီမှာ ကျွန်တော့်ကို ကောင်းကောင်း စွမ်းဆောင်နိုင်ဖို့ အတွက် လိုအပ်တဲ့ ပံ့ပိုးမှုတွေ ပေးချင်ကြပါတယ်။ ဒါပေမယ့် ကျွန်တော် တို့ဟာ ကလပ် အသင်းရဲ့ ယဉ်ကျေးမှု၊ ကစားသမားတွေရဲ့ အရည်အသွေးနဲ့ လူစာရင်းရဲ့ အတိမ်အနက် (အရန် အင်အား) တွေကို အရင်ဆုံး မြှင့်တင်ဖို့ လိုအပ်ပါတယ်။ ကျွန်တော်တို့ ဇန်နဝါရီ အပြောင်းအရွှေ့ ဈေးကွက်မှာ တော်တော်လေး လွဲချော်ခဲ့ကြတယ်။ အသင်းကို အင်အားဖြည့်တင်းမယ့် အစား ပိုပြီးတော့တောင် အင်အား လျော့နည်းသွားစေခဲ့ပါတယ်” လို့ ပြောကြားခဲ့ပါတယ်။
အဲဒီအချိန်က ချဲလ်ဆီးဟာ ဒါးဗစ် ဒက်ထရို ဖိုဖာနာနဲ့ အာရွန် အန်ဆယ်မီနို တို့ကို စထရာဘိုး အသင်းထံ အငှားချပေးခဲ့ပြီး ဂျက်ဆင် ယာဆင်း ကိုတော့ USL Dunkerque အသင်း ကနေ ပြောင်းရွှေ့ကြေး ယူရို ၇ သန်းဝန်းကျင်နဲ့ ခေါ်ယူပေးခဲ့ပါတယ်။ ဒါပေမယ့်လည်း ရာသီဝက် အတွင်း နည်းပြဟောင်း ရိုစီနီယာရဲ့ လက်အောက်မှာ အဓိက ခြေစွမ်းပြခဲ့တဲ့ နောက်ခံလူ မာမာဒူ ဆားကို ချဲလ်ဆီးက စတန်းဖို့ဒ်ဘရစ်ချ်ဆီ ပြန်လည် ခေါ်ယူခဲ့ပါတယ်။
ဒါ့အပြင် အီကွေဒေါ လက်ရွေးစင် ကန်ဒရီ ပါအက်ဇ် (Kendry Paez) ရဲ့ တစ်ရာသီစာ အငှားစာချုပ် ကိုလည်း ချဲလ်ဆီးက သက်တမ်းမပြည့်ခင် တစ်ဝက်မှာတင် ဖျက်သိမ်းခဲ့ပြီး အာဂျင်တီးနား ကလပ် ရေးဗားပလိတ် အသင်းထံ ချက်ချင်းဆိုသလို အငှားထပ်ချခဲ့တာကြောင့် စထရာဘိုး အသင်း လူအင်အား နစ်နာခဲ့ရပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
