မန်ချက်စတာယူနိုက်တက် အသင်းရဲ့ နည်းပြသစ် မိုက်ကယ် ကာရစ်ခ် ကတော့ လာမယ့် ၂၀၂၆-၂၇ ဘောလုံး ရာသီသစ်မှာ ရရှိနိုင်တဲ့ ဆုဖလား အားလုံးကို စိန်ခေါ်ဖို့ သူ့အသင်းမှာ “အရည်အသွေး အပြည့်ရှိတယ်” လို့ ယုံကြည်နေပြီး ရည်မှန်းချက်တွေကို အမြင့်ဆုံး ထားရှိလိုက်ပါတယ်။ ယူနိုက်တက်ဟာ ကာရစ်ခ်ရဲ့ ဦးဆောင်မှုနဲ့ အတူ ပြီးခဲ့တဲ့ ရာသီက ပရီးမီးယားလိဂ် အဆင့် ၃ နေရာနဲ့ ရာသီသိမ်းနိုင်ခဲ့ပါတယ်။
ယူနိုက်တက် ကွင်းလယ်လူဟောင်း ကာရစ်ခ်ဟာ ပြီးခဲ့တဲ့ ဇန်နဝါရီလက ရလဒ်ပိုင်း ဆိုးရွားလို့ ရာထူး ကနေ ထုတ်ပယ်ခံခဲ့ရတဲ့ နည်းပြ ရုဘင် အမော်ရင်ရဲ့ နေရာမှာ ယာယီ နည်းပြ အဖြစ် စတင် တာဝန်ယူခဲ့တာပါ။ သူ တာဝန်ယူပြီး နောက်ပိုင်း ယူနိုက်တက်ရဲ့ ရလဒ်တွေ သိသိသာသာ တက်လာခဲ့ပြီး ရာသီ အကုန်မှာ အဆင့် ၃ နေရာနဲ့ ချန်ပီယံလိဂ် ဝင်ခွင့်ကို သက်တောင့်သက်သာ ရယူပေးနိုင်ခဲ့ပါတယ်။ ဒါကြောင့်လည်း ကလပ် အသင်း ဘက်က သူ့ကို ၂ နှစ် သက်တမ်း ရှိတဲ့ အမြဲတမ်း နည်းပြ စာချုပ်ချုပ်ဆိုပြီး ဆုချခဲ့တာ ဖြစ်ပါတယ်။ ကာရစ်ခ်ဟာ အခုအခါ ၂၀၁၃ ခုနှစ်နောက်ပိုင်း ဝေးကွာနေတဲ့ ပရီးမီးယားလိဂ် ဖလားကို ယူနိုက်တက်ဆီ ပြန်လည် ယူဆောင်ပေးဖို့ စိတ်အားထက်သန်နေပါတယ်။
“ကျွန်တော်တို့ အသင်းမှာ လိဂ်ရဲ့ အကောင်းဆုံး အသင်းတွေကို အနိုင်ယူနိုင်တဲ့ အရည်အသွေး ရှိတယ် ဆိုတာ သိပါတယ်။ အခုလုပ်ရမှာက ရာသီ တစ်ခုလုံး ဒီခြေစွမ်းကို ထိန်းထားဖို့နဲ့ ရသမျှ ဖလား အားလုံး အတွက် တိုက်ပွဲဝင်သွားဖို့ပဲ။” လို့ ကလပ်ရဲ့ တရားဝင် နှစ်ချုပ် စာအုပ်ထဲက ပရိသတ်တွေထံ ပေးပို့တဲ့ သဝဏ်လွှာမှာ ကာရစ်ခ်က ရေးသားထားပါတယ်။
မိုက်ကယ် ကာရစ်ခ် လက်ထက် ယူနိုက်တက်ရဲ့ ရုန်းထွက်လာမှု
ကာရစ်ခ် နည်းပြ ဖြစ်လာပြီး နောက်ပိုင်း ကစားခဲ့တဲ့ ပရီးမီးယားလိဂ် ပွဲစဉ်တွေမှာ ယူနိုက်တက်ထက် နိုင်ပွဲ ပိုရတဲ့ အသင်း (၁၂ ပွဲ နိုင်) မရှိခဲ့ပါဘူး။ သူ ကိုင်တွယ်ခဲ့တဲ့ ၁၇ ပွဲမှာ ၂ ပွဲပဲ ရှုံးနိမ့်ခဲ့ပြီး သွင်းဂိုး ၃၃ ဂိုး အထိ ရှိခဲ့လို့ အဲဒီအတော အတွင်း ဂိုးအများဆုံး သွင်းနိုင်တဲ့ အသင်းလည်း ဖြစ်ခဲ့ပါတယ်။ အမော်ရင် ထွက်ခွာချိန်မှာ အဆင့် ၆ နေရာမှာ ရှိနေတဲ့ ယူနိုက်တက်ဟာ ကာရစ်ခ်ကြောင့် ရာသီကုန်ဖို့ ၂ ပွဲ အလိုကတည်းက ချန်ပီယံလိဂ် ဝင်ခွင့်ကို အပိုင် အတည်ပြုနိုင်ခဲ့တာပါ။
“အသင်းကို ကျွန်တော် ပြန်ရောက်လာတဲ့ ပထမဆုံးရက်တွေမှာ မန်ချက်စတာယူနိုက်တက်ကို ကိုယ်စားပြုခွင့်ရတာဟာ ဘယ်လောက် ဂုဏ်ယူဖို့ ကောင်းလဲ ဆိုတာ ကစားသမားတွေကို ပြောပြခဲ့ပါတယ်။ သူတို့ ကလည်း ကွင်းထဲမှာ အကောင်းဆုံး တုံ့ပြန်ပြခဲ့ကြလို့ ပြီးခဲ့တဲ့လပိုင်းတွေက တိုးတက်မှုကို အတော်လေး ဂုဏ်ယူမိပါတယ်။ ဒါပေမယ့် ကျွန်တော်တို့ ဒီထက်မက ဆက်ပြီး တိုးတက်ဖို့ လိုနေပါသေးတယ်” လို့ ကာရစ်ခ်က ဆိုပါတယ်။
လူစာရင်းကို ထပ်မံ ဖြည့်တင်းမယ့် ယူနိုက်တက်
ကာရစ်ခ်ရဲ့ ရည်မှန်းချက်ကြီးတွေကို အကောင်အထည်ဖော်ဖို့ ဆိုရင် ယူနိုက်တက် အနေနဲ့ ဒီနွေရာသီ အပြောင်းအရွှေ့မှာ အလုပ် အများကြီး လုပ်ရဦးမှာပါ။ အထူးသဖြင့် လာမယ့်ရာသီ ချန်ပီယံလိဂ် ပြန်ကစားရတော့မှာ ဖြစ်လို့ အင်အား ဖြည့်တင်းဖို့ သေချာပေါက် လိုအပ်နေပါတယ်။
လောလောဆယ်မှာ ကွင်းလယ်လူ ကတ်စ်မဲရိုးက အင်တာမိုင်ယာမီကို ပြောင်းဖို့ ရှိနေတာကြောင့် ကွင်းလယ်ပိုင်းကို အဓိက ပြင်ဆင်ရမှာပါ။ အတ္တလန္တာက ဘရာဇီးလ် ကွင်းလယ်လူ အီဒါဆင်ကို ခေါ်ယူဖို့ ကတော့ နောက်ဆုံး အဆင့်ကို ရောက်ရှိနေပြီ ဖြစ်ပါတယ်။ ဒါ့အပြင် မားတီးယက်စ် ဖာနန်ဒက်ဇ်ကို လက်လွတ်ခဲ့ရပြီးနောက် ယူနိုက်တက်ဟာ ရီးရဲလ်မက်ဒရစ်ရဲ့ ပြင်သစ် ကြယ်ပွင့် အော်ရီလီယန် ချူအာမေနီ ကိုပါ ခေါ်ယူဖို့ မျက်စိကျနေသလို၊ ဘုန်းမောက်က အဲလက်စ် စကော့တ်နဲ့ ချဲလ်ဆီးက အန်ဒရီ ဆန်းတို့စ် တို့ကိုလည်း စောင့်ကြည့်နေပါတယ်။
ယူနိုက်တက်ဟာ ကွင်းလယ်ပိုင်းတင်မကဘဲ ဂိုးသမား၊ ဘယ်နောက်ခံလူနဲ့ ဘယ်တောင်ပံ တိုက်စစ် နေရာတွေ ကိုပါ အင်အားဖြည့်တင်းဖို့ စီစဉ်နေတာကြောင့် အပြောင်းအရွှေ့ကာလ မပိတ်ခင် အထိ ကစားသမားသစ် ခေါ်ယူမှုတွေကို ဆက်လက် မြင်တွေ့ရဦးမှာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
