ပရီးမီးယားလိဂ် ကလပ် မန်ချက်စတာယူနိုက်တက် ကတော့ အသင်းရဲ့ ခံစစ်၊ ကွင်းလယ်နဲ့ တိုက်စစ်ပိုင်းတွေမှာ အသီးသီး လူအင်အား ဖြည့်တင်းဖို့ လိုအပ်နေပါတယ်။ အသင်းကို အကြီးအကျယ် အပြောင်းအလဲ လုပ်မယ့် လာမယ့် နွေရာသီ အပြောင်းအလဲ ကာလ နီးကပ်လာချိန်မှာ မန်ချက်စတာ ယူနိုက်တက်က သူတို့ရဲ့ ပထမဆုံး ကစားသမားသစ်ကို ခေါ်ယူနိုင်ဖို့ နီးစပ်နေပြီလည်း ဖြစ်ပါတယ်
ပြီးခဲ့တဲ့ နွေရာသီက ရဲရဲတင်းတင်း ငွေကြေးသုံးစွဲခဲ့မှုကြောင့် သရဲနီတွေက တိုက်စစ်ပိုင်းကို အောင်မြင်စွာ အဆင့်မြှင့်တင်နိုင်ခဲ့သလို ဂိုးသမား နေရာ ကိုလည်း အင်အား တောင့်တင်းအောင် လုပ်ဆောင်နိုင်ခဲ့ပါတယ်။ လက်ရှိမှာ မိုက်ကယ် ကာရစ်ခ်ကို နည်းပြချုပ် အဖြစ် အတည်တကျ ခန့်အပ်ပြီး ဖြစ်တာကြောင့် ယူနိုက်တက် အနေနဲ့ လာမယ့် ရာသီ အတွက် အသင်းကို အင်အား ဖြည့်တင်းမယ့် အရေးပေါ်မှာသာ အပြည့်အဝ အာရုံစိုက်နိုင်တော့မှာ ဖြစ်ပါတယ်။
ယူနိုက်တက်က ချန်ပီယံလိဂ် ပြိုင်ပွဲဆီ ပြန်လည် ဝင်ရောက်ခွင့် ရရှိခြင်းနဲ့ အတူ အသင်း အပေါ် မျှော်လင့်ချက်တွေလည်း မြင့်တက်လာတာကြောင့် ယူနိုက်တက် အနေနဲ့ အပြောင်းအလဲ ကိစ္စရပ်တွေကို ထိရောက် ကျနစွာ ဆောင်ရွက်ရတော့မှာလည်း ဖြစ်ပါတယ်။ လက်ရှိမှာ အတ္တလန္တာ အသင်းရဲ့ ခြေစွမ်းပြ ကွင်းလယ်လူ အီဒါဆင်ကို ပေါင် ၃၈ သန်းနဲ့ ခေါ်ယူဖို့ နီးစပ်နေပြီ ဖြစ်တာကြောင့် သူတို့ရဲ့ အပြောင်းအရွှေ့ ရာသီကို အလားအလာ ကောင်းကောင်းနဲ့ စတင်နိုင်ခဲ့ပြီလို့ ဆိုရမှာ ဖြစ်ပါတယ်။
ဒါပေမယ့်လည်း ဘရာဇီးလ် ကွင်းလယ်လူကို ခေါ်ယူနိုင်ခြင်းဟာ ယူနိုက်တက် အတွက် အစပျိုးရုံမျှသာ ရှိသေးပြီး လာမယ့် ရာသီ ဥရောပပြိုင်ပွဲနဲ့ ပြည်တွင်း ပြိုင်ပွဲတွေကို တစ်ပြိုင်တည်း ရုန်းကန်နိုင်မယ့် လူစာရင်းမျိုး တည်ဆောက်ဖို့ လိုအပ်နေပါသေးတယ်။ ဒါကြောင့် အီဒါဆင်ကို ခေါ်ယူပြီးနောက် ယူနိုက်တက် ဆက်လက် ပစ်မှတ်ထားသင့်တဲ့ ကစားသမား ၄ ဦးက အောက်ပါ အတိုင်း ဖြစ်ပါတယ်။
၁။ လူးဝစ် ဟောလ်
ယူနိုက်တက် အနေဖြင့် ဘယ်နောက်ခံလူ နေရာမှာ လူသစ် တစ်ဦး ဖြည့်တင်းဖို့ ရာခိုင်နှုန်း တော်တော်လေး များနေပါတယ်။ တိုင်ရဲလ် မာလာစီယာ အသင်း ကနေ ထွက်ခွာသွားခြင်း၊ ပက်ထရစ် ဒေါဂူကို နေရာပြောင်းရွှေ့ ကစားစေခြင်းနဲ့ ပွဲကျပ်ကာလတွေမှာ လုခ် ရှောရဲ့ ဒဏ်ရာ ရာဇဝင်တွေကြောင့် နည်းပြ ကာရစ်ခ် အနေနဲ့ ဒီနေရာ အတွက် တခြား ရွေးချယ်စရာ တစ်ခု လိုအပ်နေပါတယ်။ ဒါကြောင့် ပရီးမီးယားလိဂ် တစ်နှစ်တာ အကောင်းဆုံး လူငယ်ကစားသမားဆု ဆန်ကာတင် စာရင်းဝင် လူဝစ် ဟောလ် က အဓိက ပစ်မှတ် ဖြစ်လာခဲ့ပါတယ်။
အသက် ၂၁ နှစ် အရွယ် ဒီကစားသမားက ချဲလ်ဆီး ကနေ နယူးကာဆယ်ဆီ ပြောင်းရွှေ့ခဲ့ပါတယ်။ ကာဆယ်မှာ နောက်ပိုင်း ခြေစွမ်း သိသိသာသာ တိုးတက်လာခဲ့ပြီး ငှက်ကြား တို့နဲ့ အတူ ၃ ရာသီ အတွင်း ပရီးမီးယားလိဂ်နဲ့ ချန်ပီယံလိဂ် အတွေ့အကြုံ များစွာကို ရရှိခဲ့ပါတယ်။ သူက တိုက်စစ် လိုက်ပါမှု အားကောင်းပြီး ခံစစ်ပိုင်း မှာလည်း ရုန်းကန်လိုစိတ် အပြည့် ရှိတာကြောင့် လက်ရှိအချိန်မှာ အလားအလာ အရှိဆုံး နောက်ခံလူတွေ ထဲက တစ်ဦး ဖြစ်ပါတယ်။
နယူးကာဆယ် ကတော့ ဒီနွေရာသီမှာ ကစားသမား တချို့ကို လက်လွှတ်ရဖွယ် ရှိနေပြီး ဟောလ် ကလည်း ထွက်ခွာမယ့် အထဲမှာ ပါဝင်နိုင်ပါတယ်။ သူ့ကို ခေါ်ယူဖို့ အတွက် ပြောင်းရွှေ့ကြေး ပေါင်သန်း ၆၀ ခန့် အထိ သုံးစွဲရနိုင်ပါတယ်။
၂။ အဒမ် ဝှာတန်
ယူနိုက်တက် အနေနဲ့ ဒီနွေရာသီမှာ ဗဟို ကွင်းလယ်လူ အနည်းဆုံး ၂ ဦး လိုအပ်နေတာကို သိရှိထားပါတယ်။ အီဒါဆင်က ပထမဆုံး အဆင့် အနေနဲ့ ရောက်ရှိလာတော့မှာ ဖြစ်ပေမယ့်လည်း ဒုတိယမြောက် ကစားသမား အတွက်တော့ အခုထက် ပိုမို များပြားတဲ့ ပြောင်းရွှေ့ကြေးကို သုံးစွဲရမှာ ဖြစ်ပါတယ်။
ကက်စ်မဲရိုး အသင်း ကနေ ထွက်ခွာသွားခြင်းနဲ့ မန်နျူရယ် အူဂါတေးရဲ့ ရုန်းကန်နေရဆဲ ခြေစွမ်းတွေကြောင့် ကာရစ်ခ်ရဲ့ ကွင်းလယ်က အားနည်းနေပါတယ်။ ကိုဘီ မိန်းနူးက အသင်းရဲ့ အနာဂတ် ဖြစ်ပေမယ့်လည်း သူ့အပြင် တခြား အားကိုးရမယ့် ရွေးချယ်စရာတွေက စိတ်ပျက်စရာပါပဲ။ ဘရူနို ဖာနန်ဒက်စ် သို့မဟုတ် မေဆန် မောင့် တို့ကို ကွင်းလယ် အထိုင် နေရာ အထိ ဆင်းကစားစေခြင်း ကလည်း ရေရှည် အတွက် အလုပ်မဖြစ်နိုင်ပါဘူး။
အီဒါဆင်က သီးသန့် ကွင်းလယ် ခံစစ် ကစားသမား စစ်စစ် မဟုတ်ပေမယ့်လည်း ကက်စ်မဲရိုးလိုပဲ ဖျက်အား ကောင်းတဲ့ အရည်အသွေးတွေ ရှိသလို ပရီးမီးယားလိဂ် အတွေ့အကြုံလည်း ရှိပါတယ်။ ဒါကြောင့် ယူနိုက်တက် အနေနဲ့ မိန်းနူး၊ အီဒါဆင် တို့နဲ့ အတူ တွဲဖက် ကစားနိုင်မယ့် နည်းစနစ်ပိုင်း ကောင်းမွန်တဲ့ ကွင်းလယ် ဖန်တီးရှင် တစ်ဦး အတွက် ငွေအမြောက်အမြား သုံးစွဲနိုင်ပါတယ်။ အဲလီယော့တ် အန်ဒါဆင်က မန်ချက်စတာစီးတီးကို ပြောင်းရွှေ့ဖို့ ရေပန်းစားနေတာကြောင့် ခရစ္စတယ်ပဲလေ့စ်နဲ့ အတူ ကွန်ဖရင့်လိဂ် ချန်ပီယံဆုကို ဆွတ်ခူးထားတဲ့ အင်္ဂလန် ကွင်းလယ်လူ အဒမ် ဝှာတန်က ယူနိုက်တက်ရဲ့ တိုက်စစ် စွမ်းရည်ကို ပိုမိုမြှင့်တင်ပေးနိုင်မယ့် အကောင်းဆုံး ကွင်းလယ် ထိန်းချုပ်သူ (Deep-lying playmaker) ဖြစ်လာနိုင်ပါတယ်။
အသက် ၂၂ နှစ်သာ ရှိသေးတဲ့ ဝှာတန်က တည်ငြိမ် ရင့်ကျက်စွာ ကစားနိုင်သူ ဖြစ်ပြီး ၂၀၂၄ ခုနှစ် အစောပိုင်းက ပဲလေ့စ်ကို လူသိနည်းစွာ ရောက်ရှိလာခဲ့ပြီးကတည်းက အသင်း အတွက် ပွဲပေါင်း ၁၀၀ နီးပါး အထိ ကစားပေးထားပြီး ဖြစ်ပါတယ်။ သူ့ကို ခေါ်ယူဖို့ ပေါင် သန်း ၁၀၀ ဝန်းကျင် သုံးစွဲရနိုင်ပေမယ့်လည်း ကမ္ဘာ့အလားအလာ အရှိဆုံး လူငယ် ကစားသမား တစ်ဦး အတွက် ထိုက်တန်တဲ့ ရင်းနှီးမြှုပ်နှံမှု ဖြစ်လာဖို့ သေချာသလောက် ရှိနေပါတယ်။
၃။ ဘရက်ဒ်လေ ဘာကိုလာ
ယူနိုက်တက်ရဲ့ လူစာရင်းမှာ ပုံမှန်ကစားသမား စစ်စစ် မရှိတဲ့ နေရာ တစ်ခုက ဘယ်တောင်ပံ ဖြစ်ပါတယ်။ မားတီးယပ်စ် ကူညာက နည်းပြ မိုက်ကယ် ကာရစ်ခ် လက်အောက်မှာ အဲဒီနေရာ အတွက် အတိုင်းအတာ တစ်ခု အထိ အောင်မြင်အောင် ကစားပေးထားနိုင်သလို၊ ဇန်နဝါရီလက ဂါရတ်သ် ဘေးလ်လို အသွင်ပြောင်း ခြေစွမ်းပြပြီးနောက် ဒဏ်ရာကြောင့် ကာလရှည် အနားမယူရမီ အထိ ဒေါဂူ ကလည်း အဲဒီ နေရာ အတွက် ရွေးချယ်စရာ ဖြစ်ခဲ့ပါတယ်။ ဒါပေမယ့်လည်း လာမယ့် ရာသီမှာ ပွဲစဉ်တွေ ဆက်တိုက် ကစားရတော့မှာ ဖြစ်ပြီး ယူနိုက်တက် အနေနဲ့ အဲဒီ နေရာ အတွက် အထူးပြု ကစားမယ့်သူ တစ်ဦး လိုအပ်နေပါတယ်။
ဘရက်ဒ်လေ ဘာကိုလာ ကတော့ ဒီနွေရာသီ အပြောင်းအရွှေ့ ကာလမှာ ရေပန်းအစားဆုံး ဖြစ်လာနိုင်တဲ့ ကစားသမား တစ်ဦး ဖြစ်ပါတယ်။ ပီအက်စ်ဂျီမှာ စတုတ္ထ ဦးစားပေး တိုက်စစ်မှူး ဖြစ်နေတဲ့ အပြင်၊ ဥရောပ ချန်ပီယံ အသင်းက လိုက်ပ်ဇစ်က ယန် ဒီယိုမန်ဒီကို ခေါ်ယူဖို့ ပစ်မှတ်ထားနေတာကြောင့် သူ့ရဲ့ နေရာ ပျောက်ဆုံးနိုင်ပြီး ပွဲကစားခွင့် ပိုမိုရရှိမယ့် ကလပ် အသင်းသစ် တစ်သင်းဆီ ပြောင်းရွှေ့ဖို့ ကြိုးပမ်းလာနိုင်ပါတယ်။
အကယ်၍ ဘာကိုလာသာ အသင်းပြောင်းမယ် ဆိုရင် သရဲနီ ပရိတ်သတ်တွေ အနေနဲ့ ဒီယိုမန်ဒီကို ခေါ်ယူဖို့ ပစ်မှတ်ထားနေတဲ့ ပြိုင်ဘက် လစ်ဗာပူးလ် အသင်းရဲ့ ပြင်းထန်တဲ့ အပြိုင်အဆိုင် ကမ်းလှမ်းမှုတွေကို ကျော်ဖြတ် ရမှာ ဖြစ်ပေမယ့်လည်း၊ ဒီပြင်သစ် လက်ရွေးစင်ကို အရ ခေါ်ယူနိုင်ဖို့ အစွမ်းကုန် ကြိုးစားသင့်ပါတယ်။ ဘာကိုလာက လွန်ခဲ့တဲ့ ၂ ရာသီ အတွင်း သွင်းဂိုးနဲ့ ဂိုးဖန်တီးမှု စုစုပေါင်း ၅၀ အထိ ပြုလုပ်ပေးထားနိုင်ခဲ့ပြီး၊ သူ့ရဲ့ လျင်မြန်လှတဲ့ အရှိန်အဟုန်နဲ့ ဖျတ်လတ်မှုတွေကြောင့် ထိန်းချုပ်ရ အလွန် ခက်ခဲတဲ့ ကစားသမား ဖြစ်ပါတယ်။
၄။ ဂျင်းန်-ဖိလစ် မက်တေးတား
ယူနိုက်တက်က ဘင်ဂျာမင် ဆက်စ်ကိုနဲ့ အပြိုင် ကစားနိုင်မယ့် အပြင် အရန်ခုံမှာ ထိုင်ရရင်လည်း အသင်းတွင်း ပြဿနာ မရှိစေမယ့် တခြား အထောင် တိုက်စစ်မှူး တစ်ဦးကို ခေါ်ယူဖို့ စိတ်ဝင်စားနေကြောင်း သိရပါတယ်။ အဲဒီ နေရာ အတွက် အတွေ့အကြုံ ရင့်ကျက်မှုက အရေးကြီးလှတာကြောင့် ပဲလေ့စ်မှာ ခြေစွမ်းပြနေတဲ့ ဂျင်းန် ဖိလစ် မက်တေးတားက တော်တော်လေး ဆွဲဆောင်မှု ရှိတဲ့ ရွေးချယ်မှု ဖြစ်လာခဲ့ပါတယ်။
ပဲလေ့စ်မှာ ခြေစွမ်းပြနိုင်ခဲ့တာကြောင့် နည်းပြ ဒက်စ်ရွှမ့်စ်ရဲ့ ကမ္ဘာ့ဖလား ပြင်သစ် လူစာရင်းမှာ ရွေးချယ်ခံခဲ့ရတဲ့ ဒီ တိုက်စစ်မှူးက ပရီးမီးယားလိဂ်မှာ ရာသီ အလိုက် ဂိုးတွေ တောက်လျှောက် သွင်းယူပေးထားနိုင်သူ ဖြစ်ပြီး၊ အင်္ဂလန်မြေမှာ အောင်မြင်ဖို့ လိုအပ်တဲ့ ရုပ်ပိုင်းဆိုင်ရာ ကြံ့ခိုင်မှု၊ အရှိန်နှင့် ဂိုးသွင်း သေချာမှု အရည်အသွေးတွေကိုလည်း ပိုင်ဆိုင်ထားပါတယ်။
၂၀၂၆ ခုနှစ် ယူအီးအက်ဖ်အေ ကွန်ဖရင့်လိဂ် ဗိုလ်လုပွဲမှာ ပဲလေ့စ် အတွက် အနိုင်ဂိုး သွင်းယူပေးခဲ့တဲ့ အသက် ၂၈ နှစ် အရွယ် မက်တေးတားက ပြီးခဲ့တဲ့ ၃ ရာသီစလုံးမှာ တစ်ရာသီကို ၁၆ ဂိုးနဲ့ အထက် သွင်းယူပေးနိုင်ခဲ့ပြီး၊ ယူနိုက်တက်လို ကလပ် အသင်းကြီးမျိုးမှာ အရန် ကစားသမား အဖြစ် ပါဝင်ဖို့လည်း လက်ခံနိုင်ဖွယ် ရှိနေပါတယ်။
သူ့ရဲ့ ပဲလေ့စ်နဲ့ စာချုပ်က လာမယ့် နွေရာသီမှာ သက်တမ်း ကုန်ဆုံးမှာ ဖြစ်တာကြောင့် ယူနိုက်တက် အနေနဲ့ သူ့ကို ပြောင်းရွှေ့ကြေး သက်သက်သာသာနဲ့ ရရှိနိုင်မယ့် အခွင့်အရေး ရှိနေပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
