လက်ရှိမှာ BlueCo ပိုင် ပရီးမီးယားလိဂ် ကလပ် ချဲလ်ဆီးဟာ ရလဒ်ဆိုးရွားလို့ ရာထူးက ထုတ်ပယ်လိုက်တဲ့ နည်းပြ လီယမ် ရိုစီနီယာရဲ့ နေရာမှာ အမြဲတမ်း အစားထိုးဖို့ နည်းပြသစ် တစ်ဦး ရှာဖွေနေပါတယ်။
ရိုစီနီယာကို ၆ နှစ်ခွဲ သက်တမ်း ရှိတဲ့ စာချုပ်ချုပ်ဆိုပြီး ခန့်အပ်ခဲ့ပေမယ့် ၄ လအကြာမှာပဲ ချန်ပီယံလိဂ် ကနေ စောစောစီးစီး ထွက်ခွာခဲ့ရတာ၊ ပရီးမီးယားလိဂ်မှာ ဆက်တိုက် ရှုံးပွဲကြုံခဲ့ရတာတွေကြောင့် ရာထူးကနေ ထုတ်ပယ်ခဲ့တာပါ။ ဒါကြောင့် ချဲလ်ဆီး ဘက်က ဒီတစ်ကြိမ် မှာတော့ နည်းပြခန့်အပ်မယ့် ပုံစံကို ပြောင်းလဲဖို့ ကြိုးစားနေပြီး ဇာဘီ အလွန်ဆို ကလည်း ချဲလ်ဆီးရဲ့ နည်းပြ အသစ် ဖြစ်လာဖို့ စိတ်ဝင်စားမှု ရှိနေတယ်လို့ သိရပါတယ်။
ရိုစီနီယာကို အသင်းရဲ့ မဟာမိတ် ကလပ် ဖြစ်တဲ့ စထရာဘိုး ကနေ ဂရုတစိုက် တွက်ချက်ပြီး ခေါ်ယူခဲ့တာ ဖြစ်ပေမယ့်၊ ထိပ်တန်း နည်းပြ အတွေ့အကြုံ မရှိတာနဲ့ ချဲလ်ဆီး ကစားသမားတွေကို စိတ်ဓာတ် မြှင့်တင်ပေးနိုင်စွမ်း မရှိတာတွေကြောင့် ဒီစွန့်စားမှုဟာ အကြီးအကျယ် ကျရှုံးသွားခဲ့ရပါတယ်။ ပြီးခဲ့တဲ့ ဇန်နဝါရီလ အစောပိုင်းတုန်း ကလည်း အန်ဇို မာရက်စကာဟာ အသင်းရဲ့ ထိပ်တန်း အုပ်ချုပ်သူတွေနဲ့ လူသိရှင်ကြား သဘောထားကွဲလွဲပြီးနောက် လမ်းခွဲခဲ့ရပါသေးတယ်။
The Athletic ရဲ့ ဖော်ပြချက်အရ ရီးရဲလ်မက်ဒရစ်မှာ အဆင်မပြေဖြစ်ပြီးနောက် လက်ရှိမှာ အလုပ်လက်မဲ့ ဖြစ်နေတဲ့ အလွန်ဆိုကို ခေါ်ယူဖို့ ပရီးမီးယားလိဂ် ကလပ်က အခြေအနေတွေကို လေ့လာနေပါတယ်။ အသင်းရဲ့ အားကစား ကဏ္ဍ ဦးဆောင်မှုအပိုင်းက ၅ ဦးပါ ကော်မတီဟာ ရွေးချယ်စရာတွေကို သေချာ သုံးသပ်ပြီးမှ အသင်းပိုင်ရှင်တွေထံ အကြံပြုချက် တင်ပြမှာ ဖြစ်တာကြောင့် အပြီးသတ် ဆုံးဖြတ်ချက်တော့ မချရသေးပါဘူး။ ဒါပေမယ့် စပိန်လူမျိုး နည်းပြ အလွန်ဆို ကတော့ ချဲလ်ဆီး နည်းပြ ဖြစ်လာမယ့် အလားအလာကို ဆွေးနွေးဖို့ စိတ်အားထက်သန်နေပုံရပါတယ်။
ချဲလ်ဆီးနဲ့ ကွက်တိကျမယ့် ဇာဘီ အလွန်ဆိုရဲ့ ကိုင်တွယ်မှုပုံစံ
အလွန်ဆိုဟာ ပြီးခဲ့တဲ့ရာသီ ရီးရဲလ်မက်ဒရစ်မှာ အဆင်မပြေဖြစ်ခဲ့ပေမယ့် သူ့ရဲ့ ဂုဏ်သတင်း ကတော့ ကျဆင်းမသွားခဲ့ပါဘူး။ သူဟာ ကစားသမားဘဝတုန်းက ရီးရဲလ်မှာ အောင်မြင်ခဲ့ဖူးသလို၊ လေဗာကူဆင် ကိုလည်း ပြည်တွင်းဖလား နှစ်လုံးကို ရှုံးပွဲ မရှိ စံချိန်နဲ့ အသင်းသမိုင်းတစ်လျှောက် ပထမဆုံးအကြိမ် ဘွန်ဒက်စ်လီဂါ ချန်ပီယံဖြစ်အောင် စွမ်းဆောင်ပေးခဲ့တာကြောင့် ပြီးခဲ့တဲ့ နွေရာသီက လော့စ်ဘလန်ကို တို့ရဲ့ နည်းပြဖြစ်ဖို့ အသင့်တော်ဆုံးသူ အဖြစ် သတ်မှတ်ခံခဲ့ရတာပါ။
ဒါပေမယ့် ရီးရဲလ်မက်ဒရစ်လို ကမ္ဘာ့အဆင့်မီ ကြယ်ပွင့်ကစားသမားတွေ များပြားလွန်းတဲ့ အသင်းမျိုးမှာ ဇီဒန်း သို့မဟုတ် အန်ဆယ်လော့တီ တို့လို ကစားသမားတွေကို စည်းလုံးအောင်၊ စိတ်ဓာတ်တက်ကြွအောင် လုပ်ပေးနိုင်မယ့် ‘မန်နေဂျာ’ မျိုး လိုအပ်နေတာ ဖြစ်ပါတယ်။ အလွန်ဆို ကတော့ ကစားသမားတွေကို ကွင်းထဲမှာ နည်းစနစ်ပိုင်း တိတိကျကျ လေ့ကျင့်ပေးချင်တဲ့ ‘နည်းပြ’ အမျိုးအစား ဖြစ်ပါတယ်။ ပြီးခဲ့တဲ့ ဇန်နဝါရီလက သူ ရာထူးက မထုတ်ပယ်ခံရခင် ၈ လတာ ကာလ အတွင်း သူ့အပေါ် အကြီးမားဆုံး ဝေဖန်ချက် ကတော့ ‘သူ့ရဲ့ နည်းစနစ်တွေကို မလိုက်နာချင်တဲ့ ကစားသမားတွေကို အတင်းအကြပ် နည်းပြဖို့ ကြိုးစားနေခဲ့တာ’ ပဲ ဖြစ်ပါတယ်။
ဒီလို အံမဝင်ခွင်မကျ ဖြစ်ခဲ့တာက အလွန်ဆိုရဲ့ အမှားထက် ရီးရဲလ်မက်ဒရစ်ရဲ့ ကစားသမား ခေါ်ယူမှု အပိုင်း အားနည်းချက်ကြောင့်လို့ ဆိုရမှာပါ။ ပြီးခဲ့တဲ့ အပတ်က ကစားသမား အချင်းချင်း လူသိရှင်ကြား ရန်ဖြစ်ခဲ့ကြတဲ့ အထိ ပျက်စီးနေတဲ့ အသင်းတွင်း ယဉ်ကျေးမှုဟာ ကစားသမားတွေကို မထိန်းချုပ်နိုင်ခဲ့တဲ့ နည်းပြထက် ကလပ်အသင်းနဲ့ ကစားသမားတွေမှာပဲ တာဝန် ပိုရှိနေတာ သိသာခဲ့ပါတယ်။
ရီးရဲလ်မက်ဒရစ်မှာ အားနည်းချက် ဖြစ်ခဲ့တဲ့ အလွန်ဆိုရဲ့ ပုံစံမျိုးဟာ ချဲလ်ဆီး အသင်း အတွက်တော့ အပြည့်အဝ အသုံးတည့်မယ့် အချက်တွေ ဖြစ်နေပါတယ်။ အလွန်ဆိုဟာ လူငယ်ကစားသမားတွေကို ပြုစုပျိုးထောင်ပြီး သူ့ရဲ့ နည်းစနစ်ပိုင်း ကျွမ်းကျင်မှုနဲ့ ကစားသမားတွေကို ပိုတော်လာအောင် လုပ်ပေးနိုင်စွမ်း ရှိပါတယ်။ ဖလော်ရီယန် ဗစ်ဇ်ဟာ မူလကတည်းက အရည်အချင်း ရှိပြီးသား ဖြစ်ပေမယ့် အလွန်ဆိုရဲ့ လက်အောက်မှာ ပိုပြီး တောက်ပလာခဲ့သလို၊ ဂျရယ်မီ ဖရင်ပေါင်၊ ပီယာရို ဟင်ကပ်ပီယေ၊ ဗစ်တာ ဘိုနီဖေ့စ် စတဲ့ လူငယ်ခြေတက်တွေလည်း အကျိုးကျေးဇူး များစွာ ရခဲ့ပါတယ်။ ဒါ့အပြင် ဂရန်းနစ် ချာကာနဲ့ ရောဘတ် အန်းဒရစ်ခ် တို့လို ဝါရင့်ကစားသမားတွေတောင်မှ အလွန်ဆို လက်ထက်မှာ ခြေစွမ်းအထွတ်အထိပ်ကို ပြန်လည် ရောက်ရှိခဲ့ကြပါတယ်။
လက်ရှိ အရည်အချင်းရှိပြီးသား လူငယ်ကစားသမားတွေနဲ့ စုဖွဲ့ထားတဲ့ ချဲလ်ဆီးဟာ အခုလို ကစားသမားတွေကို မြှင့်တင်ပေးနိုင်မယ့် နည်းပြမျိုးကို အလွန်အမင်း လိုအပ်နေတာပါ။ ဒါ့အပြင် အလွန်ဆို ဂျာမနီမှာ အသုံးပြုခဲ့တဲ့ ကစားကွက် ပုံစံဟာလည်း ချဲလ်ဆီး အတွက် စိတ်ဝင်စားစရာ ကောင်းနေပါတယ်။ ချဲလ်ဆီးမှာ ၃-၄-၃ သို့မဟုတ် ၃-၄-၂-၁ ကစားကွက်တွေနဲ့ ကွက်တိကျမယ့် ဗဟိုနောက်ခံလူတွေနဲ့ တိုက်စစ် လိုက်ပါနိုင်တဲ့ နောက်ခံလူတွေ အများကြီး ရှိနေပါတယ်။ ကိုးလ် ပါးလ်မား၊ ပက်ဒရို နတ်တိုနဲ့ အလက်ဟန်ဒရို ဂါနာချို တို့လို တောင်ပံ တိုက်စစ် ကစားသမားတွေ ဟာလည်း ဒီကစားကွက်နဲ့ အံဝင်ခွင်ကျ ဖြစ်ပါတယ်။ ချဲလ်ဆီးဟာ ၂၀၁၆-၁၇ ရာသီက နည်းပြ အန်တိုနီယို ကွန်တီ လက်ထက်တုန်း ကလည်း ဒီလို ကစားကွက်မျိုးနဲ့ အောင်မြင်မှု ရရှိခဲ့ဖူးပါတယ်။
ဒါတွေအပြင် အလွန်ဆိုဟာ လစ်ဗာပူးလ် ကစားသမားဟောင်း ဖြစ်ခဲ့ဖူးတာကြောင့် ပရီးမီးယားလိဂ် အတွေ့အကြုံလည်း ရှိသူပါ။ သူ့ရဲ့ ကစားသမား ဘဝ တစ်လျှောက်မှာ ပြည်တွင်းလိဂ် ဖလားတွေ၊ ချန်ပီယံလိဂ် ၂ ကြိမ်၊ ကမ္ဘာ့ဖလားနဲ့ ယူရိုဖလား ၂ ကြိမ် အထိ ရရှိခဲ့ဖူးတာကြောင့် အမြင့်ဆုံး အဆင့်မှာ ဘယ်လိုအောင်မြင်အောင် ကစားရမလဲဆိုတာကို ကောင်းကောင်းကြီး နားလည်ထားသူ ဖြစ်ပါတယ်။
ချဲလ်ဆီး အသင်းရဲ့ နည်းပြအဖြစ် လျာထားခံရသူ ၅ ဦးစာရင်း
ချဲလ်ဆီးရဲ့ စိတ်ဝင်စားမှု စာရင်းမှာ ဇာဘီ အလွန်ဆို တစ်ယောက်တည်း ရှိနေတာတော့ မဟုတ်ပါဘူး။ အခုလအစောပိုင်းတုန်းက ဘုန်းမောက် ကနေ ထွက်ခွာတော့မယ့် အန်ဒိုနီ အိုင်ရာအိုလာနဲ့ ဖူလ်ဟမ် နည်းပြ မာကို ဆေးလ်ဗား တို့ရဲ့ နာမည်တွေလည်း ပါဝင်နေပါတယ်။
၁။ အန်ဒိုနီ အိုင်ရာအိုလာ
သူဟာ ပရီးမီးယားလိဂ်ရဲ့ အသင်းငယ်လေး ဖြစ်တဲ့ ဘုန်းမောက်ကို ချဲလ်ဆီးရဲ့ နေရာကို လုယူပြီး ချန်ပီယံလိဂ် ဝင်ခွင့် ရအောင် စွမ်းဆောင်ပေးနိုင်ခါနီး အခြေအနေမှာ ရှိနေပါတယ်။ သူ့ရဲ့ ကစားဟန်က မြန်ဆန် သွက်လက်ပြီး လက်ရှိ မန်ချက်စတာယူနိုက်တက် ဘက်ကလည်း မိုက်ကယ် ကာရစ်ခ်အပြင် စိတ်ဝင်စားနေတဲ့ တစ်ဦးတည်းသော နည်းပြလည်း ဖြစ်ပါတယ်။
သူက ပရီးမီးယားလိဂ်မှာ သက်သေပြပြီးသား ဖြစ်ပေမယ့် အားနည်းချက် ကတော့ အသင်းငယ်တွေ ကိုပဲ အောင်မြင်အောင် တည်ဆောက်နိုင်တဲ့ နည်းပြ အဖြစ် နာမည်ကြီးတာပါ။ ချဲလ်ဆီးဟာ အရင်ကလည်း ဂရေဟမ် ပေါ်တာ ကို ခေါ်ယူတုန်းက ဒီလိုလမ်းကြောင်းဟောင်းကို လျှောက်ခဲ့ဖူးပြီး၊ ဖိအားများပြီး အရာရာ ကြီးမားကျယ်ပြန့်တဲ့ အသင်းကြီးတွေမှာ အသင်းငယ်က အတွေ့အကြုံတွေက အမြဲတမ်း အလုပ်မဖြစ်တတ်ပါဘူး။
၂။ မာကို ဆေးလ်ဗား
သူကတော့ ဟားလ်စီးတီး၊ ဝက်ဖို့ဒ်၊ အဲဗာတန် တို့နဲ့ အတူ အင်္ဂလန်မှာ ဆယ်စုနှစ်တစ်ခုနီးပါး အလုပ်လုပ်ခဲ့သူ ဖြစ်ပါတယ်။ ဖူလ်ဟမ်ကို ပရီးမီးယားလိဂ်မှာ အခြေခိုင်အောင် လုပ်ပေးနိုင်ခဲ့ပြီး ၂၀၂၂-၂၃ ရာသီက အဆင့် ၁၀ ရအောင် စွမ်းဆောင်ပေးခဲ့သလို၊ ဒီရာသီမှာလည်း ဒီထက်ကောင်းတဲ့ ရလဒ် ရနိုင်ခြေ ရှိနေပါတယ်။ ဒါပေမယ့် သူဟာ လွန်ခဲ့တဲ့ ၁၀ နှစ်က အိုလံပီယာကော့စ်နဲ့ ဂရိစူပါလိဂ်ဖလား ရခဲ့ပြီးကတည်းက အဓိက ဆုဖလား ကြီးကြီးမားမား တစ်ခုမှ မရဖူးသေးပါဘူး။
၃။ အိုလီဗာ ဂလက်စနာ
The Telegraph ရဲ့ ဖော်ပြချက်အရ ခရစ္စတယ်ပဲလေ့စ်မှာ အစွမ်းပြနေတဲ့ ဂလက်စနာလည်း စာရင်းထဲ ပါဝင်လာပါတယ်။ သူဟာ ပြီးခဲ့တဲ့ရာသီက ပဲလေ့စ် အသင်း သမိုင်းမှာ ပထမဆုံးအကြိမ် အဖြစ် အက်ဖ်အေဖလားကို ရယူပေးထားသလို၊ အခုလထဲ မှာလည်း ကွန့်ဖရန့်လိဂ် ဗိုလ်လုပွဲမှာ ရေယို ဗာယီကာနိုနဲ့ ရင်ဆိုင်ရမှာဖြစ်လို့ ဥရောပဖလားတစ်ခု ထပ်ရဖို့ အခွင့်အရေး ရှိနေပါတယ်။ သူဟာ ဖရန့်ဖတ်နဲ့လည်း ယူရိုပါလိဂ် ရဖူးပါတယ်။ ဒါပေမယ့် သူဟာ ပဲလေ့စ်ရဲ့ အုပ်ချုပ်မှုပိုင်းနဲ့ လူသိရှင်ကြား သဘောထားကွဲလွဲမှုတွေ ရှိနေတာကြောင့် နွေရာသီမှာ ထွက်ခွာဖို့ ဖြစ်လာတာ ဖြစ်ပြီး၊ ဒါက ချဲလ်ဆီး ကနေ မာရက်စ်ကာ ထွက်သွားခဲ့ရတဲ့ ပုံစံမျိုးနဲ့ ဆင်တူနေပါတယ်။
၄။ ဖိလစ်ပီ လူဝစ်
သူကတော့ ချဲလ်ဆီး ကစားသမားဟောင်း ဖြစ်ပြီး၊ မကြာသေးမီက ဘရာဇီးက ဖလာမင်ဂိုကို ကိုင်တွယ်ကာ ကိုပါ လစ်ဘာတေးဒိုးရက်စ် ဖလားကို ရရှိခဲ့သူ ဖြစ်ပါတယ်။ လက်ရှိ မှာတော့ သူ့မှာ ချဲလ်ဆီးကို ကိုင်တွယ်ခွင့်ရမယ့် UEFA ပရိုလိုင်စင် မရှိသေးပေမယ့် ဒီလက်မှတ်ကို အမြန်ဆုံးရရှိအောင် လုပ်ဆောင်ပေးနေတယ်လို့ သတင်းတွေ ထွက်နေပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
