ဘရိုက်တန်ကို အနိုင်ယူပြီး ရလဒ်ဆိုးနေမှု ရပ်တန့်နိုင်ခဲ့တဲ့ ဗီလာ (ပရီးမီးယားလိဂ် ပွဲပြီးသုံးသပ်ချက်)

ဘရိုက်တန် ၀-၂ အက်စတွန်ဗီလာ

ပရီးမီးယားလိဂ် နိုင်ပွဲ ပြန်လည် ရှာဖွေဖို့ ကြိုးပမ်းခဲ့ကြတဲ့ ဘရိုက်တန်နဲ့ အက်စတွန်ဗီလာ တို့ရဲ့ တွေ့ဆုံမှု ကလည်း တော်တော်လေး အကြိတ်အနယ် ရှိပြီး ကြည့်ကောင်းခဲ့ပါတယ်။ ခြေစွမ်းပိုင်း ကွာဟမှု သိပ်မရှိခဲ့ပေမယ့် အဆုံးသတ် သေချာတဲ့ အက်စတွန်ဗီလာတို့ ဂိုးပြတ် နိုင်ပွဲ တစ်ပွဲ ပြန်လည် ရရှိသွားခဲ့တာ ဖြစ်ပါတယ်။

ပွဲစဉ်အကျဉ်း

နှစ်သင်းလုံး အဓိက ကစားသမား အစုံအလင်နဲ့ ပွဲထွက်လာခဲ့ကြပြီး ဘရိုက်တန်ရဲ့ ၃-၅-၂ ကစားကွက်မှာ ထရော့ဆက်ဒ်၊ မူပေး၊ ဘစ်ဆူးမား၊ မက်အဲလစ္စတာ၊ မူပေး၊ ဒန့်ခ်၊ ကူကရယ်လာ၊ လမ့်ပ်တေးတို့ ပါဝင်ခဲ့ကြပါတယ်။ ၄-၃-၁-၂နဲ့ ပွဲထွက်ခဲ့တဲ့ အက်စတွန်ဗီလာ ကတော့ တိုက်စစ်မှာ အိုလီဝက်ကင်န်စ်နဲ့ ဒန်နီအင့်ဂ်ကို တွဲဖက်ပေးခဲ့ပြီး ကွင်းလယ်မှာ ကော်တင်ဟို၊ ဒေါက်ဂလပ်စ် လူးဝစ်၊ ရမ်ဆေး၊ မက်ဂင်းန်၊ ခံစစ်နဲ့ ဂိုးမှာတော့ မင်းဂ်၊ ကွန်ဆာ၊ ဒစ်ဂ်နီး၊ ကတ်ရှ်နဲ့ မာတီနက်ဇ် ကိုပဲ အသုံးပြုခဲ့ပါတယ်။

ပွဲအစပိုင်းမှာ တစ်သင်းနဲ့ တစ်သင်း အခြေအနေ ကြည့်ပြီး ကစားခဲ့ပေမယ့် ပွဲချိန် ၁၇ မိနစ်မှာ အက်စတွန်ဗီလာတို့ မထင်မှတ်ပဲ ဦးဆောင်ဂိုး ရရှိသွားခဲ့လို့ ပွဲက တဖြည်းဖြည်း သွက်လာခဲ့ပါတယ်။ ဒစ်ဂ်နီးရဲ့ ဖြတ်တင်ပေးပို့မှုကို ဘရိုက်တန် နောက်တန်းက ခေါင်းတိုက် ဖျက်ထုတ်ခဲ့ပေမယ့် ဧရိယာ ထိပ်မှာ ရှိနေတဲ့ မက်တီ ကတ်ရှ်က မထင်မှတ်ပဲ အဝေးကန်ချက်နဲ့ လှလှပပ ကန်သွင်းသွားခဲ့တာ ဖြစ်ပါတယ်။ အဲ့နောက် အိမ်ရှင်တို့ ဘောလုံး ပိုင်ဆိုင်မှု အသာစီးရယူပြီး မတ်ချ်၊ လမ့်ပ်တေး၊ ကူကာရယ်လာတို့ တောင်ပံတွေ က တစ်ဆင့် ချေပဂိုး ရဖို့ ကြိုးပမ်းခဲ့ပေမယ့် ထိရောက်တဲ့ တိုက်စစ်ဆင်မှုတွေတော့ မလုပ်နိုင်ခဲ့ပါဘူး။ အက်စတွန်ဗီလာ ကတော့ အပိုင်အခွင့်အရေး စောင့်ခဲ့ပြီး တန်ပြန် တိုက်စစ်ကိုပဲ အားပြုခဲ့ပေမယ့် ဘရိုက်တန် ထက် ထိရောက်တဲ့ ခြိမ်းခြောက်မှုတွေ ပိုပြီး ပြုလုပ်နိုင်ခဲ့ပါတယ်။ ကော်တင်ဟိုရဲ့ ဖရီးကစ်ကို ဆန်းချက်ဇ် ကာကွယ်ခဲ့ရသလို ကတ်ရှ်ရဲ့ ကန်ချက် ဂိုးတိုင်ဘေးက ကပ်ထွက်သွားလို့သာ ဘရိုက်တန်တို့ ကံကောင်းခဲ့ရတာ ဖြစ်ပါတယ်။

ဒါပေမယ့် ၆၈ မိနစ် မှာတော့ တန်ပြန် တိုက်စစ် ကနေ မင်းဂ် ကန်တင်ပေးလိုက်တဲ့ ဘောလုံးကို အိုလီဝက်ကင်န်က တောက်လျောက် ဆွဲပြေးပြီး အမှားအယွင်းမရှိ ကန်သွင်းသွားခဲ့လို့ ဧည့်သည် ဗီလာတို့ ဒုတိယဂိုး ထပ်ရခဲ့ပါတယ်။ လက်ကျန် မိနစ်တွေ ဘရိုက်တန်တို့ ကွင်းတစ်ဝက် အထိ တက်ဖိပြီး ချေပဂိုး ရဖို့ အားစိုက်ခဲ့ပေမယ့် ဂိုးပေါက် တည့်အောင် ၁ ကြိမ် ကန်နိုင်ခဲ့တာ ကလွဲရင် များများစားစား မစွမ်းဆောင်နိုင်ခဲ့ပါဘူး။ ဒါကြောင့် ၀-၂ ရလဒ် နဲ့ပဲ ပွဲပြီးခဲ့ပြီး အက်စတွန်ဗီလာတို့ ဘရိုက်တန်ကို ဒီရာသီ ပရီးမီးယားလိဂ် မှာ အိမ်ကွင်း၊ အဝေးကွင်း နှစ်ကျော့စလုံး ၂ ဂိုးပြတ် ရလဒ်နဲ့ အနိုင်ယူနိုင်ခဲ့ပါတယ်။

ပွဲပြီးသုံးသပ်ချက်

နှစ်သင်းလုံး လိုအပ်နေတဲ့ အနိုင် ၃ မှတ် အတွက် အားထည့်ခဲ့ကြပြီး ပါးပါးနပ်နပ် ကစားသွားတဲ့ အက်စတွန်ဗီလာတို့ အနိုင်ရသွားခဲ့တာ ဖြစ်ပါတယ်။ ဘရိုက်တန် ကတော့ ဘောလုံး ကိုင်ထားနိုင်ရုံ ကလွဲရင် ကွင်းလယ်နဲ့ တိုက်စစ် အချိတ်အဆက် ပျက်နေခဲ့တာကြောင့် ဗီလာ ဂိုးပေါက်ကို ထိရောက်တဲ့ ခြိမ်းခြောက်မှုတွေ ပြုလုပ်နိုင်ခြင်း မရှိခဲ့တာ ဖြစ်ပါတယ်။

ဒီရလဒ်ကြောင့် ဂျရတ်ရဲ့ အသင်းက ပရီးမီးယားလိဂ် ၂ ပွဲဆက် အရှုံးကနေ ပြန်လည် ရုန်းထ နိုင်ခဲ့ပြီး ဒီရာသီ အတွက် ၅ ပွဲမြောက် အဝေးကွင်း နိုင်ပွဲ ရရှိခဲ့ပေမယ့် ဘရိုက်တန် ကတော့ ၃ ပွဲဆက် အရှုံးနဲ့ အတူ အဆင့် ၁၀ နေရာကို ဆင်းပေးခဲ့ရပါတယ်။

လာမယ့်ပွဲစဉ်များ

နှစ်သင်းလုံး မတ်လ ၅ ရက်နေ့မှ ပရီးမီးယားလိဂ် ပွဲစဉ်တွေ ပြန်လည် ကစားရမှာ ဖြစ်ပြီး ဘရိုက်တန်က နယူးကာဆယ်၊ အက်စတွန်ဗီလာက ဆောက်သမ်တန်နဲ့ ရင်ဆိုင်ရမှာ ဖြစ်ပါတယ်။

 

●●●

နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS

အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်

ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , တွစ်တာ , အင်စတာဂရမ် and ယူကျု့ဘ်.